परभणी : मागील काही दिवसांपासून परभणीच्या तापमानाचा पारा घसरत असून, त्यानुसार मंगळवारी (ता.२१) ७.६ अंश सेल्सिअस इतके नीच्चांकी तापमान नोंदविण्यात आले आहे. यामुळे परभणीकरांना (Parbhani) बोचऱ्या थंडीचा सामना करावा लागत आहे. विशेष म्हणजे येणाऱ्या चार दिवसांत जिल्ह्यासह मराठवाड्याचे (Marathwada) तापमान घटल्याची शक्यता वसंतराव नाईक मराठवाडा कृषी विद्यापीठाच्या हवामान विभागाने (Weather) वर्तवली आहे. परभणी जिल्ह्यात नोव्हेंबरलाच थंडी दाखल झाली होती. मात्र, यंदा ऐन दिवाळीत तापमानात वाढ झाल्याने वातावरणातील गारवा नाहीसा झाला होता. त्यानंतर आता पुन्हा तापमानात घट होत आहे. (Parbhani Weather Updates Extreme Cold Hikes)

गेल्या काही दिवसांपासून परभणीचे किमान तापमान १० अंशाच्या खाली आले आहे. त्यात आज मंगळवारी तर ७.६ अंश एवढ्या निच्चांकी तापमानाची नोंद येथील वसंतराव नाईक मराठवाडा कृषी विद्यापीठातील हवामानशास्त्र विभागात झाली आहे. या वर्षातील हे आतापर्यंतचे सर्वात कमी तापमान असूून, यापुढे त्यात आणखी घट होण्याची शक्यता व्यक्त करण्यात आली आहे. उत्तर भारतात निर्माण झालेली थंडीची लाट यावर्षीच्या थंडीला कारणीभूत आहे. त्याप्रमाणेच यंदा जिल्ह्यात जोरदार पाऊस झाला. ज्यामुळे जिल्ह्याची पाणी पातळी देखील वाढली आहे. सर्वत्र मोठ्या प्रमाणात पाण्याची साठवणूक झाली आहे. त्यामुळे जिल्ह्यात थंडीचा कडाका वाढला असावा अशी शक्यता वर्तविण्यात आली आहे.