परभणी : शहरातील तिन्ही पोलिस ठाण्याच्या परिसरात पहाल तिकडे जुन्या, गंजून गेलेल्या सायकली, मोटारसायकलींचा खच पडलेला दिसतो. धूळखात पडलेली ही वाहने कायद्याच्या कचाट्यात सापडल्याने वर्षानुवर्षांपासून एकाच जागेवर ठेवण्यात आल्याने अनेक दुचाकी जागेवरच गंजून गेल्याचे चित्र आहे.

परभणी शहरातील नानलपेठ, नवामोंढा व कोतवाली पोलिस ठाण्याच्या परिसरात अशा कित्येक दुचाकींसह सायकली दिसून येतात. गुन्ह्यांच्या तपासात जप्त करण्यात आलेलीही वाहने जोपर्यंत गुन्ह्याचा तपास पूर्ण होत नाही, निकाल पूर्णपणे लागत नाही, तोपर्यंतही वाहने पोलिस ठाण्यातच ठेवली जातात. तर, अनेक दुचाकी या अपघातातील, तर काही इंजीन बदलेले, चेसीस क्रमांकावर खाडाखोड असतात. मात्र, सद्यःस्थितीत शहरातील तिन्ही पोलिस ठाण्यांच्या परिसरात शेकडो वाहनांचा खच दिसून येत आहे. वर्षानुवर्षांपासून ठाण्याच्या परिसरात मिळेल त्या ठिकाणी वाहनांची थप्पी करून ठेवली आहे.

हेही वाचा - परभणीत भाजपला हवाय आक्रमक चेहरा

वाहने वापरण्यास टाळतात...
मागील काही वर्षांत गुन्ह्याचा तपास झालेली दुचाकी वाहने ज्या त्या मालकास परत करण्यात येत आहेत. मात्र, याची संख्या कमी असते. कारण, न्यायालयीन प्रक्रियेनंतरच वाहने वाहनधारकांच्या ताब्यात दिल्या जातात. वेळप्रसंगी वाहनमालकाचाही शोध पोलिस यंत्रणेलाच घ्यावा लागतो. नानलपेठ, कोतवाली व नवामोंढा पोलिस ठाण्यासह जिल्ह्यातील सर्वच पोलिस ठाण्यात अशी असंख्य दुचाकी वाहने पडली आहेत. अनेक दुचाकी या अपघातातील असतात. अपघातातील वाहने नागरिक शक्यतो वापरण्याचे टाळतात. शिवाय, रस्त्यावर, चोरीच्या तपासातून सापडलेल्या दुचाकी वर्षानुवर्षांपासून ठाणे परिसरात पडून असतात. धुळीने माखलेली ही वाहने कालांतराने भंगारात काढण्यालायक होतात. वार्षिक तपासणी दरम्यान, या वाहनांवरची काहीशी धूळ झटकली जात असावी.

हेही वाचा - जिल्ह्यातील रब्बी पिके संकटात !

कालांतराने ‘बेवारस’
पोलिस ठाण्यातील मोकळी जागा हमखास या दुचाकींनी व्यापलेली दिसून येते. ही वाहने कोणाच्या उपयोगात नसल्याने जागेवरच खराब होत आहेत. वाहनधारकांनी वेळेत संपर्क साधला तर वाहने मिळतातही. मात्र, चोरीच्या गुन्ह्यात जप्त केलेल्या दुचाकी परजिल्ह्यातीलही असतात. संबंधित दुचाकीधारक पोलिस ठाण्यात येण्यास धजावत असल्यानेही अशा दुचाकी कालांतराने ‘बेवारस’ होत आहेत.

वाहनांचा शुक्रवारी लिलाव
नवामोंढा पोलिस ठाणे परिसरात ठेवलेल्या ‘बेवारस’ दुचाकी अनेक आहेत. अशा ‘बेवारस’ दुचाकींचा लिलाव शुक्रवारी करण्यात येणार आहे. ज्या नागरिकांची दुचाकी चोरीस गेली आहे, हरवली आहे, त्यांचा अद्याप तपास लागला नाही, अशांनी कागदपत्रांसह नवामोंढा पोलिसांशी संपर्क साधावा. कागदपत्रांची तपासणी करून वाहने दिल्या जातील, अन्यथा शुक्रवारी (ता. सात) वाहनांचा लिलाव करण्यात येईल.
- रामेश्वर तट,
पोलिस निरीक्षक, नवामोंढा पोलिस ठाणे, परभणी.