परभणी ः पदवी कृषी शिक्षण घेणाऱ्या विद्यार्थ्यांप्रमाणे पदव्युत्तर कृषी (एम.एस्सी) च्या विद्यार्थ्यांना देखील शिष्यवृत्ती देण्यासंदर्भात शिवसेनेचे आमदार डॉ.राहूल पाटील यांनी विधानसभेत लक्षवेधी प्रश्‍नाद्वारे आवाज उठविला होता. आमदार डॉ.पाटील यांच्या मागणीला यश आले असून शासनाने एम.एस्सी कृषी शिक्षण घेणाऱ्या विद्यार्थ्यांनादेखील शिष्यवृत्ती देण्यात येईल, असा गुरूवारी शासन निर्णय (ता.पाच) काढला. 

सध्या राज्य शासनाचे विधिमंडळ अधिवेशन सुरू आहे. या अधिवेशनात गुरूवारी आमदार डॉ.पाटील यांनी या प्रश्‍नाबाबत लक्षवेधी मांडली. यानंतर राज्य शासनाने शासन निर्णय जारी केला आहे.

हेही वाचा - अध्ययन निष्पत्तीत विद्यार्थी बनताहेत स्मार्ट, कसे ते बघाच

परभणीतही विद्यार्थ्यांनी अनेकदा केली आंदोलने 
राज्यात वसंतराव नाईक मराठवाडा कृषी विद्यापीठ, डॉ. पंजाबराव देशमुख कृषी विद्यापीठ, महात्मा फुले कृषी विद्यापीठ (राहूरी), कोकण कृषी विद्यापीठ आहेत. या विद्यापीठात कृषीचे पदवीपर्यंत शिक्षण घेणाऱ्या विद्यार्थ्यांना व्यवसाय शिक्षणाचा दर्जा दिला असल्याने शिष्यवृत्ती देण्यात येत होती. परंतू, पदव्युत्तर शिक्षण घेणाऱ्या म्हणजे एम.एस्सीच्या विद्यार्थ्यांना शासन धोरणाप्रमाणे शिष्यवृत्तीचा लाभ मिळत नव्हता. त्यामुळे राज्यातील विद्यार्थ्यांमध्ये असंतोष होता. कृषी पदव्युत्तर पदवीला व्यावसायिक दर्जा मिळावा व शिष्यवृत्ती सुरू करावी या मागणीसाठी चार कृषी विद्यापीठातील शेकडो विद्यार्थी कृषी शिक्षण व संशोधन परिषद पूणे येथे २५ फेब्रुवारीपासून धरणे आंदोलन करत होते. याबाबत परभणीतही कृषी विद्यापीठातील विद्यार्थ्यांनी अनेकदा आंदोलने केली होती. 

हेही वाचा - तुम्ही वाचाच : ‘हा’ अभ्यासक्रम देतो शंभर टक्के नोकरी

मंत्र्यांशी दालनात केली चर्चा 
विद्यार्थ्यांच्या या प्रश्‍नावर आमदार डॉ. राहूल पाटील यांनी विधानसभेत लक्षवेधीच्या प्रश्‍नांच्या माध्यमातून पदव्युत्तर विद्यार्थ्यांना शिष्यवृत्ती देण्या संदर्भात शासनाने निर्णय घेण्याची विनंती केली. त्यानुसार बहुजन कल्याण विभागाचे मंत्री विजय वडेट्टीवार यांच्या दालनात आमदार डॉ.राहूल पाटील यांच्याशी याबाबत सविस्तर चर्चा करण्यात आली. 

या अकरा अभ्यासक्रमांचा समावेश 
कृषी पदव्युत्तर पदवीसह कृषीच्या ११ अभ्यासक्रमांना ज्यात एम.एस्सी(कृषी), एम.एस्सी(उद्यानविद्या), एम.एस्सी.(वनशास्त्र), एमएफएससी (मत्स्यविज्ञान), एम.टेक.(अन्नतंत्रज्ञान), एम.एस्सी(कृषी जैवतंत्रज्ञान), एम.टेक(कृषी आभियांत्रिकी), एम.एस्सी(गृहविज्ञान), एम.एस्सी(काढणी पश्‍चात व्यवस्थापन), एमबीए(कृषी), एमबीएम(कृषी व्यवसाय व व्यवस्थापन), एम.एस्सी(ए.बी.एम) या अभ्यासक्रमांना व्यावासायिक अभ्यासक्रम म्हणून घोषित केले आहे. त्यामुळे राज्यातील हजारो विद्यार्थ्यांना शिष्यवृत्ती, कर्जे आदी सवलती मिळणाचा मार्ग सूकर झाला आहे.