आष्टी (जि.बीड) : पुणे (Pune) येथे रूग्णाला सोडून परत बीडला जात असलेल्या रुग्णवाहिकेला बीडवरून (Beed) कोल्हापुरकडे जात असलेल्या भरधाव कारने जोराची धडक दिली. यामध्ये एक व्यक्ती ठार झाला, तर तीन व्यक्ती गंभीर जखमी झाल्याची घटना मंगळवारी (ता.३०) सकाळी साडेआठ वाजण्याच्या सुमारास आष्टी तालुक्यातील (Ashti) सुर्डी फाट्यावरील वळणावर घडली. गंभीर जखमींना अहमदनगर (Ahmednagar) येथील रुग्णालयात उपचारासाठी दाखल करण्यात आले आहे. सोमवारी (ता.२९) बीड येथून पुण्याला रूग्ण घेऊन गेलेली रूग्णवाहिका (एमएच२० ईजी ५१३०) रूग्णाला पोहोच करून बीडला परतत असताना बीडवरून कोल्हापुरकडे निघालेल्या भरधाव कारने (एमएच०९ बीएम ५९८६ ) आष्टी तालुक्यातील सुरुडी फाट्यावरील वळणावर समोरासमोर दोन्ही वाहनांची जोरदार धडक होऊन झालेल्या अपघातात अवधुत गरगटे (वय ३१) हा जागीच ठार झाला असुन अन्य तिघेजण गंभीर जखमी झाले.(Beed Accident)

सदरील घटनेची माहिती मिळताच परिसरातील नागरिकांनी जखमींना मदत केली. उपचारासाठी अहमदनगर येथील रुग्णालयात दाखल करण्यात आले असुन त्यांची प्रकृती गंभीर आहे. ही घटना बीड- नगर राज्य महामार्गावरील सुर्डी फाटा येथे मंगळवारी सकाळी साडेआठ वाजता घडली. रूग्णवाहिका चालक संतोष सुरवसे (रा.बीड) हा या अपघातात किरकोळ जखमी झाला आहे.