पूर्णा: ज्या वडिलांनी हाताचे बोट धरून चालायला शिकवले. गोष्टी सांगून स्वप्न पाहायला शिकवले त्यांचे अचानक निधन झाले. पण, अशा कठीण प्रसंगातही तिने वडिलांचे अंत्यदर्शन घेऊन त्यांच्या स्वप्नपूर्तीसाठी सोमवारी (ता. चार) दहावीची परीक्षा देऊन कृतिशील श्रद्धांजली अर्पण केली. कोमल रामराव माने असे त्या धीरोदात्त मुलीचे नाव आहे. येथील रामराव माने यांचे रविवारी संध्याकाळी अल्पशा आजाराने निधन झाले. त्यांना दोन मुली आहेत. एकीचे नुकतेच बाळांतपण झाले तर धाकटी कोमल येथील विद्या प्रसारिणी शाळेत दहावीत शिकते. वडिलांच्या अकस्मात निधनामुळे रडून-रडून रात्रभर तिचे डोळे सुजले होते.

ती गलितगात्र झाली होती. सोमवारी सकाळी तिचा दहावीचा भूगोलचा पेपर होता. तिचे चुलते राजू माने, सावता माने आणि चित्रकार रवी बिछडे यांनी तशा अवस्थेत तिचे मनोबल वाढवून तिला अंत्यविधीस उपस्थित न राहता परीक्षा देण्यास प्रवृत्त केले. सोमवारी एकीकडे वडिलांवर अंत्यसंस्कार सुरू होते तर दुसरीकडे कोमलने परीक्षा दिली. मुख्याध्यापक देवीदास उमाटे, केंद्रसंचालक प्रकाश रौंदळे आणि पर्यवेक्षक शिवाजी माखणे यांनी तीची परीक्षा होईपर्यंत संपूर्ण काळजी घेत व तिला धीर देत मानसिक आधार दिला. वडिलांचे पार्थिव घरात अन् कोमल पॅड व पेन उचलून परीक्षा केंद्राकडे निघाली ते दृश्य पाहून प्रत्येकजण गलबलला.