परतूर (जि.जालना) - मुंबईवरून रुग्णवाहिकेने परतूर शहरात बुधवारी (ता.२९) सायंकाळी दाखल झालेल्या ५ पैकी एका व्यक्तीचा कोरोना अहवाल पॉझिटिव्ह आल्याने खळबळ उडाली आहे. दरम्यान, संबंधित रुग्णाच्या निकट संपर्कात आलेल्या ४ जणांचे नमुने कोरोना चाचणीसाठी पाठविण्यात आले आहेत. इतर संपर्कातील परतूर येथील १७ तर सातोना येथील ११ जणांना संस्थात्मक क्वारंटाईन करण्यात आले असल्याची माहिती तालुका आरोग्य अधिकारी डॉ.जाहेद सय्यद यांनी दिली. 

मुंबई येथील वडाळा भागातून रुग्णवाहिकेतून शहरातील अक्षयनगर भागात बुधवारी सायंकाळी चार जण दाखल झाले होते, ते नातेवाईकाकडे थांबले असल्याची माहिती परतूर पोलिसांना गुरुवारी सकाळी मिळाली होती. प्राप्त माहितीनुसार पोलिसांनी तातडीने अक्षयनगर येथे जाऊन शहानिशा केली असता रुग्णवाहिकेत चालकासह इतर पाच जण मुंबईवरून आल्याचे आढळून आले. वरील सर्वांना तातडीने ताब्यात घेऊन जालना येथील सामान्य रुग्णालयात दाखल करण्यात आले. त्यांचे नमुने तपासणीसाठी पाठविण्यात आले होते. शुक्रवारी सायंकाळी या पाच पैकी एका जणाचा अहवाल पॉझिटिव्ह आला. रात्री उशिरा प्रशासनाकडून परतूर शहरात प्रतिबंधात्मक उपाय योजना करण्याची कारवाई सुरु करण्यात आली.

हेही वाचा : जालन्याला एकाएकी धक्का : पाच जण कोरोना पॉझिटिव्ह

शनिवारी सकाळी शहरातील जीवनावश्यक वस्तूंच्या दुकानासह दुध विक्रेत्यांना मज्जाव करण्यात आला होता. संचारबंदी अधिक कडक करण्यात आली होती. शहरात येणारे सर्व मार्ग सील करण्यात आले.

हेही वाचा : जालन्याला यायचंय, या लिंकवर करा अर्ज

प्राप्त माहितीनुसार कोरोना पॉझिटिव्ह रुग्ण परतूर तालुक्यातील सातोना खुर्द येथील मूळ राहिवासी आहे, मात्र गेल्या सात-आठ महिन्यापासून तो कामासाठी मुंबई येथे गेला होता. परतूर शहरातील इंदिरानगर रोडवर त्याची पत्नी राहते. बुधवारी मुंबईवरून आल्यानंतर परतूर शहरातील आपल्या सासूरवाडीत त्याने मुक्काम केल्याची माहिती आहे. शिवाय सातोना येथे रुग्णाचे आई-वडील राहतात. ते सातोना येथील कार भाड्याने घेऊन त्याला परतूर येथे भेटण्यास आले होते. ज्या व्यक्तीच्या कार मधून त्यांनी सातोना ते परतूर असा प्रवास केला त्या कार चालकाला देखील होम क्वारंटाईन करण्यात आले आहे.