अंधारी (जि.औरंगाबाद) ः पळशी (ता. सिल्लोड) परिसरातील अंधारी, लोणवाडी, मांडगाव, उपळी, म्हसला परिसरात शुक्रवारपाठोपाठ रविवारी सोमवारी व मंगळवारी जोरदार पाऊस झाल्याने सर्वाधिक नुकसान मका पिकाचे झाले आहे. हातातोंडाशी आलेला घास परतीच्या पावसाने हिरावल्याने शेतकरी अडचणीत आले आहेत.

तोडणी करून शेतात ठेवलेली मकाची कणसे पाण्यात भिजल्याने अनेक ठिकाणी कणसांना कोंब फुटले आहेत. गेल्या आठवड्यात परिसरात ढगाळ वातावरण असल्याने मका सोंगणीसाठी शेतकऱ्यांची लगबग सुरू होती. मात्र, शुक्रवारपासून परतीच्या पावसाने अधूनमधून जोरदार हजेरी लावल्याने मकाचा चारा पूर्णपणे भिजला आहे. परिसरात बहुतांश शेतकरी शेतीसह पशुपालन मोठ्या प्रमाणात करतात. मकाच्या कडब्याचा जनावरांसाठी चारा म्हणून मोठ्या प्रमाणात वापर केला जातो; परंतु गेल्या दोन-तीन दिवसांपासून परिसरात पडत असलेल्या पावसाने मकाचा कडबा पूर्णपणे भिजला आहे. अजून एक दोन दिवस पाऊस असाच चालू राहिल्यास भविष्यात चाराटंचाईच्या संकटाला सामोरे जावे लागणार आहे.