परभणी : महापालिकेने आपली रिंग रोडवरील अतिक्रमण हटाव मोहिम सलग पाचव्या दिवशी देखील सुरूच ठेवली असून सोमवारी (ता.१५) कॅनॉलवरील पक्की बांधकामे पाडण्यास सुरुवात झाली.
 
कॅनॉलवरील काही घरांना मोहिमेचा फटका 
महापालिकेने आपल्या पाचव्या दिवशीच्या मोहिमेत शंभर फुटाचा रिंग रोडवर वरील पक्की बांधकामे पाडण्यास सुरुवात केली. गेल्या चार दिवसांपासून संरक्षण भिंती, टीन शेड अशी अतिक्रमणे काढली जात होती. परंतू, सोमवारी पक्की बांधकामे पाडण्यास सुरुवात केली. उघडा महादेव मंदिर परिसर तसेच रिंग रोडमध्ये येणाऱ्या कॅनॉलवरील काही घरांना या मोहिमेचा फटका बसला. उपायुक्त प्रवीण गायकवाड, सहायक आयुक्त श्रीकांत कांबळे, मुख्य स्वच्छता निरीक्षक करण गायकवाड, विद्युत अभियंता सोहेल खान, स्वच्छता निरीक्षक मेहराज अहेमद, न्यायरत्न घुगे, शेख शादाब, श्रीकांत कुरा, विकास रत्नपारखे, लक्ष्मण जोगदंड, उद्यान विभागाचे अथरखान आदींच्या हरितात्या काली मलेरिया व स्वच्छता विभागाचे अनेक कर्मचारी, कामगार या मोहिमेत सक्रिय होते. 

कुटुंबियांवर आपापली घरी सोडून देण्याची वेळ
काही भागात रस्त्यांच्या साईड पट्ट्यामध्ये मुरूम अंथरण्याचे काम सुरू होते तर काही भागात जेसीबीच्या साह्याने मलबा हटवल्या जात होता. उद्यान विभागाच्या वतीने तोडलेली झाडे घेऊन जाण्याचे काम केले जात होते. सायंकाळी रिंग रोडमध्ये येणारे कॅनॉलवरील पक्की बांधकामे पाडण्यास सुरुवात झाली. वर्षानुवर्षांपासून कॅनॉलवरील जायकवाडी पाटबंधारे विभागाच्या जागेवर राहणाऱ्या या कुटुंबियांना रस्त्याचे काम सुरू झाल्यामुळे आपापली घरी सोडून देण्याची वेळ आली. 

हेही वाचा - नांदेड : कत्तलीसाठी घेवून जाणाऱ्या २४ बैलांना इतवारा पोलिसांमुळे मिळाले जिवदान

बघ्यांची प्रचंड गर्दी 
महापालिकेने रिंग रोडवरील अतिक्रमणे हटविण्यास सुरुवात केल्यानंतर या संपूर्ण रस्त्यावर बघ्यांची प्रचंड गर्दी उसळत आहे. येणारे हे नागरिक त्याच परिसरातील नाहीतर शहरातून देखील येत असून कशा पद्धतीने मोहीम राबवली जात आहे याची पाहणी करीत आहेत. 

हेही वाचा - नांदेड : सेवानिवृत्त शिक्षणाधिकारी झाले उपसरपंच; गावातील समस्या सोडविण्यासाठी घेतला पुढाकार

आता शहरातील मोहीमेकडे लक्ष 
महापालिकेने रिंग रोडवरील अतिक्रमणे हटविण्यास सुरुवात केली असतानाच शहरात देखील ही मोहीम राबवली जाणार असल्याचे जाहीर केले आहे. परंतु पालिका शहरात अतिक्रमण हटाव मोहीम केव्हा राबवणार याबाबत मात्र उलटसुलट चर्चा सुरू आहे. केवळ नाल्यांवरील अतिक्रमणे न हटवता पालिकेने शहरातील आपल्या जागांचा शोध घेऊन त्या देखील ताब्यात घ्याव्यात, अशी भावना देखील नागरिकांमधून व्यक्त होत आहे.   

संपादन ः राजन मंगरुळकर