औंढा नागनाथ (जि.हिंगोली) : तालुक्यातील पूर्णा नदीपात्रातून अवैध वाळुची चोरटी वाहतूक करणाऱ्या वाहनाच्या पाठीमागे शनिवारी (ता.२९) रात्री महसूलचे पथक लागल्याने वाहनधारकाने औंढा-हिंगोली जाणाऱ्या रस्त्यावर वाळू टाकून पळ काढला. मात्र रस्त्यावर टाकलेल्या वाळुच्या ढिगाऱ्याने रस्त्यावरुन ये-जा करणाऱ्या वाहनधारकांची गैरसोय झाली. औंढा (Aundha Nagnath) तालुक्यातील पूर्णा नदीच्या सर्व घाटावर तहसीलमधील महसूलचे पथक अवैध वाळू वाहतूक करणाऱ्या वाहनांची धरपकड सुरू केली आहे. दोन दिवसांपूर्वी महसूलच्या पथकाने १५० ब्रास वाळू व दुसऱ्या दिवशी दोन ट्रॅक्टर पकडले. त्यामुळे वाळूमाफियांची धाबे दणाणले आहेत. दरम्यान, शनिवारी रात्रीला महसूल पथक वाहनाच्या पाठीमागे लागल्यामुळे वाळुची चोरटी वाहतूक करणाऱ्या वाहन धारकाने वाहनातील वाळू औंढा - हिंगोली (Hingoli) रोडवरच टाकून दिली व त्या ठिकाणाहून पळ काढला. (Revenue Team Follow Sand Vehicle In Hingoli)

वाहनातील वाळू रोडवर टाकल्यामुळे या रस्त्यावरुन ये-जा करणाऱ्या वाहनांना मोठा त्रास सहन करावा लागत आहे. औंढा महसूल विभागाच्या वतीने अवैधरीत्या गौण खनिज वाळू वाहतूक करणाऱ्या वाहनावर मोठ्या प्रमाणात कारवाई होत आहे. त्यामुळे सध्या वाळूमाफियांचे चांगलेच धाबे दणाणले आहेत.