परभणी : लातूर येथे अडकून पडलेले शैक्षणिक साहित्य आणण्यासाठी जिल्हा प्रशासनाने पालकांना पास देण्याचे घोषित केले आहे. ‘सकाळ’ने हा प्रकार बुधवारच्या (ता. सहा) अंकातून ‘विद्यार्थ्यांची अडचण समजून घेणार का? ’ या मथळ्याखाली वृत्त प्रकाशीत करण्यात आले होते. याची दखल घेत प्रशासनाने जिल्ह्यातील विद्यार्थ्यांचे शैक्षणिक नुकसान होऊ दिले जाणार नाही, असे सांगत पालकांनी 'ई - पास'साठी अर्ज करावेत, असे आवाहन केले. त्यानुसार बुधवारी (ता. सहा) बहुतांश पालकांनी अर्ज सादर केले.

परभणी जिल्ह्यातील हजारो विद्यार्थी लातूर येथे शिक्षणासाठी राहतात. परंतु, देशात सुरवातीला २१ दिवसांची टाळेबंदी लागू झाल्यानंतर सर्वच विद्यार्थी त्यांचे शैक्षणिक साहित्य तेथेच ठेवून परभणी जिल्ह्यात परत आले होते. परंतु, कालांतराने कोरोना विषाणू संसर्गामुळे देशातील टाळेबंदीचा कालावधी वाढत गेला आणि त्याच नीट व इतर परीक्षांच्या तारखा जाहीर झाल्याने विद्यार्थ्यांसह त्यांच्या पालकांसमोर पुस्तकाविना अभ्यास कसा करावयाचा, हा प्रश्न पडला होता. या संदर्भात ‘सकाळ’ने बुधवारी (ता.सहा) हा प्रकार समोर आणला. ‘विद्यार्थ्यांची अडचण समजून घेणार का? ’ या मथळ्याखाली वृत्त प्रकाशीत होताच वृत्ताची दखल घेत जिल्हा प्रशासनाने तातडीने हालचाली करून या पालकांना लातूर येथे जाण्यासाठी पासेस देण्याचे आश्वासन दिले आहे. त्यामुळे या सर्व पालकांचा लातूर येथे जाऊन मुलांचे पुस्तके आणण्याचा मार्ग मोकळा झाला आहे.

हेही वाचा व पहा : व्हिडिओ : प्रथमच भाविकांविना नृसिंह जन्मोत्सव

वैद्यकीय प्रमाणपत्रासाठी पालकांच्या रांगा
लातूर येथे जाण्यासाठी ई-पास देण्याचे प्रशासनाने कबुल केले आहे. त्यामुळे या पाससाठी वैद्यकीय प्रमाणपत्र आवश्यक आहे. हे प्रमाणपत्र घेण्यासाठी गुरुवारी पालकांनी जिल्हा रुग्णालयाच्या तपासणी केंद्रावर गर्दी केली होती.

विद्यार्थ्यांचे नुकसान होणार नाही
लातूर येथे शिक्षणासाठी असलेल्या विद्यार्थ्यांचे शैक्षणिक साहित्य लातूर येथे अडकले आहे. परीक्षा तोंडावर असल्याने सदरील शैक्षणिक साहित्य विद्यार्थ्यांना आवश्यक असल्याचे सांगून पालकांचे शिष्ठ मंडळ जिल्हाधिकाऱ्यांना भेटले आहे. जिल्हाधिकाऱ्यांनी कोणत्याही विद्यार्थ्यांचे नुकसान होऊ नये, अशी भूमिका घेतली असून पालकांना ई-पाससाठी अर्ज करण्याचे सांगितले आहे.
- स्वाती सूर्यवंशी, उपजिल्हाधिकारी, परभणी