परतूर (जि. जालना) -  तालुक्‍यातील सातोना येथे परतूर-सेलू मार्गावर मंगळवारी (ता. 17) रात्री 11 ते 12 वाजेच्या सुमारास वाळू माफियांनी महसूल विभागाच्या पथकावर हल्लाबोल केला. यात जीव वाचवीत पथकातील कर्मचाऱ्यांनी तब्बल दहा किलोमीटर अंतर पळून काढले. या घटनेत चालकास मारहाणीसह शासकीय जीपची नासधूसही माफियांनी केली. 

परतूरच्या तहसीलदार रूपा चित्रक यांच्या मार्गदर्शनाखाली वाळू तस्करी रोखण्यासाठी पथक स्थापन करण्यात आलेले आहे. हे पथक परतूर-सेलू रस्त्यावर गस्त घालत होते. तेव्हा सातोना टी-पॉइंटवर चाळीस ते पन्नास वाळू माफियांच्या टोळीने या पथकाची जीप अडवीत हल्लाबोल केला. यात वाहनचालक शेख अतिक किरकोळ जखमी झाला. तर पथकातील तलाठी अशोक यादव, मुकुंद कुलकर्णी, आर. व्ही. रेड्डी, पी. व्ही. काकडे यांनी तब्बल दहा किलोमीटर अंतरावरील सेलूपर्यंत पळ काढत आपला जीव वाचवला.

हेही वाचा : बेपत्तांचा लागेना पोलिसांना पत्ता

विशेष म्हणजे वाळू माफियांनी जीपची नासधूस केली. त्यानंतर जीप सेलू पोलिस ठाण्याच्या हद्दीत नेऊन उलटवली. याबाबत माहिती मिळताच पोलिस निरीक्षक शिरीष हुंबे यांनी घटनास्थळी भेट दिली.