बीड : राष्ट्रवादीच्या फुटीनंतर शरद पवार गटाने महाराष्ट्र दौरा आयोजित केला असून आज बीड येथे शरद पवार यांची जाहीर सभा होणार आहे. या स्वाभिमान सभेचा काल टीझर प्रदर्शित करण्यात आला होता. आज होणाऱ्या सभेत परळीचे पंचायच समितीचे माजी सभापती बबन गिते शरद पवार यांच्या उपस्थितीत राष्ट्रवादी काँग्रेसमध्ये प्रवेश करणार आहेत.

दरम्यान, पक्षप्रवेशाआधी बबन गिते यांनी तबब्ल ७०० चारचाकी गाड्यांचा ताफा घेऊन शक्तीप्रदर्शन केलं आहे. वैद्यनाथाचा अभिषेक करून बबन गीते शक्तीप्रदर्शन करत, आपल्यासोबत गाड्यांचा ताफा घेत परळीकडून बीडकडे रवाना झाले आहेत.

धनंजय मुंडे यांना देणार आव्हान

राष्ट्रवादी पक्षामध्ये अजित पवार यांनी बंड केलं आणि आपल्यासोबत काही आमदार घेऊन भाजपसोबत सत्तेत सहभागी झाले. यावेळी अजित पवार गटाच्या ९ आमदारांना मंत्रिपद मिळालं. यामध्ये परळीच्या धनंजय मुंडे यांना प्रतिष्ठेचं कृषीमंत्रीपद मिळालं. पण आमदार मुख्य पक्षातून फुटून गेल्यामुळे अनेक कार्यकर्ते संभ्रमात पडले. त्याचबरोबर अजित पवारांनी दोन तीन वेळा शरद पवारांची भेट घेतल्यामुळे हे बंड शरद पवारांच्याच आशिर्वादाने होत असल्याच्या चर्चा झाल्या पण काल पवारांनी स्पष्टीकरण दिलं आणि राष्ट्रवादी भाजपसोबत कधीच जाणार नसल्याचं स्पष्ट केलं.

त्यानंतर आता प्रत्येक ठिकाणी राष्ट्रवादीचे दोन गट पडल्याचं पाहायला मिळत असून धनंजय मुंडे यांच्या मतदारसंघातही बबन गिते यांच्या रूपाने विरोधक निर्माण झाला आहे. येणाऱ्या काळात परळी मतदार संघाचे आणि धनंजय मुंडे यांचे भवितव्य काय असेल याकडे लक्ष असणार आहे.