बीड - जिल्ह्यातून वेगवेगळ्या ठिकाणी एसटी महामंडळाच्या चार शिवशाही स्लीपर कोच बस आहेत; मात्र त्यांचे प्रवास भाडे जास्त असल्याने त्यांना अल्प प्रतिसाद होता. त्यामुळे एसटी महामंडळाने प्रवास भाड्यात कपात करण्याचा निर्णय घेतला असून, बुधवारपासून (ता. 13) शिवशाही स्लीपर बसचे भाडे कमी होणार आहे. शिवाय लवकरच बीड येथून कल्याण, ठाणे, बोरीवली या मार्गांवर ही सेवा सुरू करण्यात येणार आहे.
सध्या जिल्ह्यात चार शिवशाही स्लीपर बस सुरू आहेत. यामध्ये बीड-मंबई व परळी-मुंबई या मार्गावर या बस धावत आहेत; परंतु या बसचे जास्त भाडे असल्यामुळे अनेक प्रवासी खासगी बसने प्रवास करत होते; परंतु आता एसटी महामंडळाने प्रवाशांना आकर्षित करण्यासाठी शिवशाहीचे दर मोठ्या प्रमाणात कमी केले आहेत. 230 ते 505 रुपयांपर्यंतची भाडे कपात करण्यात आली आहे. यामुळे जिल्ह्यातील प्रवाशांना पूर्वीपेक्षा मुंबई, पुणे, नगर याठिकाणी जाण्यासाठी कमी पैसे द्यावे लागणार आहेत. नवीन दर बुधवारपासून लागू होणार असल्याची माहिती बीड एसटी आगाराचे संतोष महाजन यांनी दिली.
असे असणार नवीन दर
मार्ग....पूर्वीचे दर....नवीन दर
बीड ते मुंबई....1,130.....885
बीड ते पुणे....700....525
बीड ते नगर....385...285
परळी ते मुंबई....1,385...1,035
परळी ते पुणे....955...715
अंबाजोगाई ते मुंबई....1,320....990
जिल्ह्यातील प्रवाशांच्या सोयीसाठी जिल्हा महामंडळाच्या वतीने अनेक चांगले निर्णय घेण्यात येतात. यामध्ये सध्या शिवशाही स्लीपरचे दर मोठ्या प्रमाणात कमी करण्यात आलेले आहेत. याचा फायदा जिल्ह्यातील प्रवाशांना होणार आहे. तरी जिल्ह्यातील प्रवाशांनी एसटीच्या वातानुकूलित शिवशाही शयनयान (स्लीपर) व बसने प्रवास करावा.
- बीड विभाग नियंत्रक श्री. सुपेकर
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.