जिंतूर : देशाची लोकशाही मजबूत करण्यासाठी प्रथम आद्यकर्तव्य समजून देवसडी येथील वर श्रीकांत व नववधू अल्का यांनी विवाह बंधनात पडण्याअगोदर मतदानाचा हक्क बजावुन लोकशाहीतील मुलभूत अधिकाराचे महत्त्व दाखवून दिले.

आज (ता.२६) सर्वत्र लोकसभा निवडणुकीनिमित्त लोकशाहीचा उत्सव सुरू असताना तालुक्यातील देवसडी येथील रावसाहेब गिते यांचे चिरंजीव श्रीकांत आणि गावातील उध्दवराव काळे यांची कन्या अल्का यांचा संध्याकाळी विवाह असल्याने दोन्ही कुटुंबात लगीनघाई सुरू होती.

यावेळी वर श्रीकांत व वधू अल्का यांनी विवाह बंधनात पडण्याअगोदर अगोदर मतदान करण्याचा निर्णय घेतला व सकाळी लोकशाहीच्या उत्सवात सहभागी होऊन मतदानाचा हक्क बजावला.याबद्दल वऱ्हाडी मंडळीसह गावकऱ्यांनी या नवदांपत्याचे कौतुक करून अभिनंदन केले.