परभणी : सत्तेपासून दूर गेल्याने भाजपचे नेते अस्वस्थ झाले आहेत. त्यांची अस्वस्थता त्यांच्या वागण्यातून दिसून येते. महाविकास आघाडीच्या लोकप्रतिनिधी, मंत्र्यांना टार्गेट करुन ईडीसारख्या यंत्रणांचा दुरुपयोग केला जात असल्याचा आरोप शिवसेनेचे खासदार डॉ. श्रीकांत शिंदे (Shrikant Shinde) यांनी गुरुवारी (ता.२४) केला. शिवसेनेच्या शिवसंपर्क अभियानाअंतर्गत परभणी जिल्ह्यातील विविध तालुके व जिल्हा परिषद गटांतील नागरिकांशी थेट संवाद साधण्यासाठी व शिवसैनिकांच्या अडीअडचणी समजुन घेण्यासाठी खासदार शिंदे हे परभणी दौऱ्यावर आहेत. गुरुवारी त्यांनी परभणी (Parbhani) शहरातील शिवसैनिकांशी संवाद साधला. (Shrikant Shinde Says, BJP Feel Unwell Due To Power)

त्यानंतर ते पत्रकारांशी बोलत होते. यावेळी शिवसेना (Shiv Sena) जिल्हाप्रमुख विशाल कदम, सहसंपर्क प्रमुख डॉ.विवेक नावंदर, विष्णू बोराडे, अंबिका डहाळे, विधानसभा प्रमुख तथा उपजिल्हा प्रमुख माणिक पोंढे पाटील यांच्यासह इतरांची उपस्थिती होती. खासदार शिंदे म्हणाले, गेल्या तीन दिवसांमध्ये परभणी जिल्ह्यातील विविध तालुके आणि विभागांना भेटी देत तेथील शिवसेना पदाधिकारी यांच्या समवेत नागरिकांशी संवाद साधला आहे. त्यांचे प्रश्न समजून घेत ते सोडविण्यासाठी मुख्यमंत्री तथा शिवसेना पक्षप्रमुख उद्धव ठाकरे (Uddhav Thackeray) यांची लवकरच भेट घेऊन जनतेच्या भावना त्यांच्यापर्यंत पोहोचवल्या जाणार आहेत.

आपले सरकार सत्तेवर आले असून मुख्यमंत्री शिवसेनेचे असल्याने सामान्य कार्यकर्त्यांच्या अपेक्षाही वाढल्या आहेत. त्या दृष्टीने जनतेच्या मनात काय आहे हे जाणून घेऊन विविध योजनांंच्या प्रभावी अंमलबजावणीसाठी प्रयत्न केले जातील, असेही शिंदे यांनी यावेळी सांगितले.