हिंगोली :  जिल्ह्यात कोरोना रुग्णांची वाढती संख्या लक्षात घेता सात दिवसाची संचारबंदी लागु करण्यात आली आहे. संचारबंदीच्या सहाव्या दिवशी शनिवारी (ता. तीन) हिंगोलीकरांचा संयम सुटला असून शहरात ठिकठिकाणी गर्दी दिसत होती. दुचाकी वाहनधारकांची संख्या देखील वाढल्याचे चित्र होते.

हिंगोली जिल्ह्यात कोरोनाचे संकट वाढत असल्याने जिल्हाधिकारी रुचेश जयवंशी यांनी जिल्ह्यात दुसऱ्यांदा सात दिवसाची संचारबंदी लागु केली आहे. शनिवारी संचारबंदीचा सहावा दिवस होता. या दिवशी सकाळपासून शहरात गर्दी झालेली दिसत होती. रस्त्यावर दुचाकीस्वाराच्या वाहनाची संख्या वाढली होती. 

हेही वाचा - जिल्हा बॅंक निवडणुक : हेलिकाॅप्टर व रोड रोलरचे भवितव्य मतपेटीत बंद; 97.98 टक्के मतदान -

तसेच शहरात जागोजागी भाजी विक्रेते स्टाँल लाऊन भाज्यांची विक्री करीत होते. जिल्हा परिषद शाळेच्या मैदानाजवळ जिल्हा परिषद कार्यालयाकडे जाणाऱ्या रस्त्यावर भाजी विक्रेते व फळ विक्रेते थांबल्याने येथे खरेदीसाठी गर्दी झाली होती. तसेच पोसँट आँफीस, जवाहर रोड भागात अनेक ठिकाणी भाजीपाला व फळ विक्रेत्यांनी दुकाने सुरु होती.

यासह पेन्शनपुरा भागात देखील भाजीपाला विक्रीची दुकाने सुरू होती. यामुळे शहरात ठिकठिकाणी गर्दी दिसत होती. दुचाकीवर फिरणाऱ्या नागरिकांची देखील गर्दी होती. संचारबंदी नंतर चार दिवस रस्त्यावर शुकशुकाट होता मात्र सहाव्या दिवशी रस्त्यावर गर्दी दिसत होती. जिल्हाधिकारी सोशल मीडीयावर नागरिकांना वारंवार संचारबंदीचे नियम पाळा गर्दी करु नका सोशल डिस्टनचे पालन करा, मास्क वापरा असे सांगत आहेत. मात्र याकडे दुर्लक्ष होताना दिसत आहे. कोरोनाची साखळी तोडण्यासाठी या उपाय योजना गरजेच्या असल्याचे जिल्हाधिकारी सांगत आहेत. परंतु शनिवारी नागरिकांचा संयम सुटल्याचे दिसत होते.

संपादन- प्रल्हाद कांबळे

.