परभणी ः लॉकडाउनमध्ये देवाची आळंदी येथे अडकलेल्या परभणी जिल्ह्यातील ५० कामगार कुटूंब अडकले असून त्यांना अन्नधान्याची गरज आहे, असा संदेश परभणी जिल्हा परिषदेचे माजी अध्यक्ष राजेश विटेकर यांनी राष्ट्रवादी कॉँग्रेसचे शिरुरचे खासदार डॉ.अमोल कोल्हे यांना कळवताच डॉ.कोल्हे यांच्या जगदंब प्रतिष्ठाणने तत्काळ अन्नधान्य देत मदत केली आहे.
   
परभणी जिल्ह्यातील बहुतांष नागरिक पुणे जिल्ह्यात कामानिमित्त स्थायिक आहेत. लॉकडाउनपुर्वी काही लोक परतले. परंतु, जे अडकले आहे त्यांची आता परवड सुरु झाली आहे. बहुतांष लोक हे पुणे आणि परिसरात असणाऱ्या विविध कंपन्यात कामाला आहेत. घरात असलेले अन्नधान्य संपले आणि गावाकडे परतीचा मार्ग बंद झाल्याने आता उपासमार होत आहे. जमा असलेली पुंजी देखील संपली. बाहेर संचारबंदी त्यामुळे या मजुर कुटूंबाचे हाल सुरु झाले आहेत. 

हेही वाचा - तो म्हणतो हलका का होईना पण मी येणारच, काय ते वाचा...

राजेश विटेकर यांनी केला डॉ.कोल्हे यांना फोन  
एका कुटूंबाने परभणी जिल्ह्यातील राष्ट्रवादीचे नेते आणि माजी जिल्हा परिषद अध्यक्ष राजेश विटेकर यांना मोबाईलवर संपर्क साधुन व्यथा सांगितली. त्यामुळे तत्काळ विटेकर यांनी ही बाब शिरुरचे खासदार आणि अभिनेते डॉ.अमोल कोल्हे यांच्या कानावर घातली. त्याची डॉ.कोल्हे यांनी तत्काळ दखल घेत आपल्या जगदंब प्रतिष्ठाणच्या माध्यमातून मदत केली. त्यांनी गहू, तांदूळ आणि किराना साहित्याच्या किट आळंदीकडे रवाना केल्या. प्रतिष्ठाणचे डॉ. शैलेश मोहीते पाटील यांनी स्वत:त्या परभणी जिल्ह्यातील गरजु कुटूंबाना अन्नधान्य व किराणा साहित्य पोचते केले. यासाठी स्थानिक राष्ट्रवादी युवक कॉँग्रेसच्या पदाधिकाऱ्यांही पुढाकार घेतला.

हेही वाचा - बांधकाम व्यवसायही डबघाईला

चाकण, मावळ भागात अडकले नागरिक 
पुणे जिल्ह्यात मोठ्या संख्येने परभणी जिल्ह्यातील नागरिक अडकलेले आहेत. चाकण, मावळ आदी भागात रोजगारासाठी गेलेले अडकुन पडले असून आळंदी येथे मदत झाल्याचे कळताच अन्य भागातून देखील मदतीसाठी राजेश विटेकर यांच्याकडे संपर्क होत आहे. श्री. विटेकर हे त्या-त्या भागातील राष्ट्रवादी कॉँग्रेसच्या स्थानिक लोकप्रतिनिधी व पदाधिकारी यांच्याशी संपर्क साधत आहेत.

सुरतमध्ये अडकले ३७ कुटूंब
गुजरातमधील सुरत येथे जिल्ह्यातील ३७ कुटूंब कामानिमीत्त गेले होते. सध्या ते तेथे अडकुन पडले असून जवळ असलेले अन्नधान्य संपले असून त्यांनाही राजेश विटेकर यांच्याशी संपर्क साधला असून विटेकर यांनी त्यांच्या मदतीसाठी प्रयत्न सुरु केले आहेत.