लातूर: कोरोनाचा कहर थोडासा कमी होत असतानाच आता डेंगीने थैमान घातले आहे. शासकीय सोबतच खासगी रुग्णालयात या रोगाचे रुग्ण वाढू लागले आहेत. शहरासोबतच जिल्ह्यात देखील रुग्णांची संख्या वाढत आहे. शहरात आता महापालिकेच्या वतीने उपाय योजना केल्या जात आहेत. यात धूर फवारणीवर भर दिला जात आहे. यावर्षी जिल्ह्यात तसेच शहरात कोरोनाचा मोठा कहर राहिला. दोन हजार चारशे पेक्षा जास्त नागरिकांचा बळी कोरोनाने घेतला आहे. गेल्या काही महिन्यांपासून कोरोना रुग्णांची संख्येत लक्षणीय घट होत आहे. त्यामुळे व्यवहार आता सुरळीत सुरु झाले आहेत. असे असताना आता लातूरकरांना डेंगीचा सामना करावा लागत आहे.

ग्रामीण भागात डेंगीला आवर-
जिल्हा परिषदेच्या आरोग्य विभागाने ग्रामीण भागात डेंगीने तोंड वर काढताच उपाययोजनांवर भर दिला. मुख्य कार्यकारी अधिकारी अभिनव गोयल यांनी ग्रामपंचायतींना पत्र देऊन धूर फवारणी व अॅबेटींग करण्याचे आदेश दिले. अॅबेटींग व धूर फवारणीसाठी आरोग्य विभागाकडे मुबलक प्रमाणात औषधांचा साठा होता. त्याचे तातडीने वितरण ग्रामपंचायतींना करण्यात आले. मागील आठवड्यात अॅबेटींग व धूर फवारणी मोठ्या प्रमाणात करण्यात आली. त्याचा परिणाम दिसून आला. मागील आठवड्यात डेंगीचा रूग्ण आढळून आला नसल्याची माहिती जिल्हा हिवताप अधिकारी डॉ. आर. आर. शेख यांनी दिली. मागील आठवड्यात ३६ रुग्णांच्या तपासणीत आठ रूग्ण आढळून आल्याचेही त्यांनी सांगितले.

शहरात चार झोन आहेत. महापालिकेकडे अठरा धूर फवारणी मशिन आहेत. गेल्या आठवड्यात प्रत्येक प्रभागात एकाच ठिकाणी चार- चार मशिन देवून फवारणी केली गेली. धूर फवारणीचा कार्यक्रमच तयार करण्यात आला आहे. दररोज ही फवारणी केली जात आहे. तसेच स्प्रेईंगच्या माध्यमातून देखील फवारणी
सुरु आहे.
-कलिम शेख, प्रमुख स्वच्छता निरीक्षक, महापालिका.