लातूर : मराठा आरक्षण अंमलबजावणी व मनोज जरांगे पाटील यांच्या बेमुदत उपोषणास पाठिंबा देण्यासाठी बुधवारी (ता.१४) पुकारण्यात आलेला राज्यव्यापी ‘बंद’मध्ये लातूर शहर व जिल्ह्याचा समावेश असणार आहे. समाजबांधवांनी या ‘बंद’मध्ये सहभागी व्हावे असे आवाहन सकल मराठा समाजबांधवांनी केले आहे.

लातूर येथे यासंदर्भात मंगळवारी समाजबांधवांची बैठक झाली. उपोषणकर्ते मनोज जरांगे पाटील यांच्या सूचनेप्रमाणे हा ‘बंद’ शांततेत व सनदशीर मार्गाने होणार आहे, असे नमूद करण्यात आले आहे. बीड जिल्हा ‘बंद’बाबत मराठा क्रांती मोर्चाने केलेल्या आवाहनाला जिल्ह्यात मुस्लिम बांधवांसह संघटनेने पाठिंबा दिला आहे. जालना जिल्ह्यातही ‘बंद’ पाळला जाणार आहे.