हिंगोली : सेनगाव तालुक्यातील सवना येथील शेतकरी नितीन नायक यांनी दोन गुंठ्यामध्ये स्ट्रॉबेरी लागवडीचा प्रयोग यशस्वी केला आहे. आत्तापर्यंत स्ट्रॉबेरी उत्पादनातून त्यांनी ८० हजार रुपयाचे उत्पादन मिळवले आहे. पुढील काळात स्ट्रॉबेरीचे क्षेत्र वाढवणार असल्याचे त्यांनी सांगितले.

सेनगाव तालुक्यातील सवना येथील प्रगतशील शेतकरी नितीन नायक हे तीन वर्षापूर्वी महाबळेश्वर व परिसरामध्ये गेले होते. त्या ठिकाणी थंड वातावरणात येणाऱ्या स्ट्रॉबेरी बदल माहिती घेतली. व हा उपक्रम करण्याचा निश्चय केला. त्यामुळे त्यांनी सवना येथील वातावरण व महाबळेश्वर येथील वातावरणातील साम्य लक्षात घेतले. त्यानुसार सवना येथे स्ट्रॉबेरीचे लागवड करता येऊ शकते हे त्यांच्या लक्षात आले. मात्र पाच एकर शेती असताना स्ट्रॉबेरी लागवडीचा मोठ्या क्षेत्रावर प्रयोग करणे धोकादायक असल्यामुळे त्यांनी केवळ दोन गुंठ्यामध्येच प्रयोग करण्याचा निर्णय घेतला.

हेही वाचा - हिंगोली : पुरजळ पाणी पुरवठा योजनेचा विज पुरवठा सुरु करण्यासाठी झेडपीचा पुढाकार

त्यानुसार पाचगणी येथून स्ट्रॉबेरीची अकराशे रोपे आणली. त्यानंतर ही रोपे दोन गुंठ्यात मच्छीलींग करुन लावली नोव्हेंबर महिन्यात रोपांच्या लागवडी नंतर फवारणी पाणी पाळी याकडे लक्ष दिले. अवघ्या दोन महिन्यात स्ट्रॉबेरीचे उत्पादन सुरु झाले जानेवारी महिन्यापासून स्ट्रॉबेरीचे उत्पादन सुरु झाले. जानेवारी महिन्यापासून स्ट्रॉबेरी तोडणी करुन स्थानिक बाजारपेठेत विक्रीला सुरुवात केली. सध्या स्ट्रॉबेरीला ४०० ते ५०० रुपये किलो भाव मिळाला वाशिम, कनेरगाव नाका व हिंगोली या बाजारपेठेत त्यांनी स्ट्रॉबेरीची विक्री केली आहे.

अवघ्या दीड महिन्यात त्यानी एक क्विंटल ६० किलो स्ट्रॉबेरीची विक्री केली आहे. त्यातून ८० हजार रुपयाचे उत्पन्न मिळाले असून आणखीन पंधरा ते विस दिवस उत्पन्न मिळणार आहे असे सांगितले.

केवळ थंड हवेच्या ठिकाणी येणाऱ्या स्ट्रॉबेरी लागवडीचा प्रयोग नितीन नायक यांनी हिगोली जिल्ह्यातील सवना गावामध्ये यशस्वी करुन दाखविला आहे. हा प्रयोग पाहण्यासाठी परिसरातील शेतकरी गर्दी करु लागली आहे. इतर पिकाच्या तुलनेत कमी लागवड क्षेत्रामध्ये चांगले उत्पन्न मिळत असल्याने पुढील काळात स्ट्रॉबेरी लागवडीचे क्षेत्र वाढविण्याचा विचार असून या भागातील तरुण शेतकऱ्यांनाही मार्गदर्शन करणार आहे. असे नितीन नायक यांनी सांगितले.

संपादन- प्रल्हाद कांबळे