आष्टी (बीड): बळजबरीने जागेत घुसून मालमत्तेचे नुकसान केल्याबाबत आमदार सुरेश धस यांच्याविरोधात पोलिसात तक्रार केली म्हणून अज्ञात व्यक्तींनी परत आमच्या जागेत येऊन मालमत्तेचे नुकसान केले. याबाबत आष्टी पोलिस तक्रार घेत नसल्याने आष्टीतील दांपत्याने मुख्यमंत्री, गृहमंत्र्यांसह संबंधितांकडे निवेदनाद्वारे तक्रार केली आहे. तसेच दोन दिवसांत आरोपींना अटक करून आम्हाला संरक्षण न पुरविल्यास पोलिस अधीक्षकांच्या घराबाहेर उपोषणाला बसण्याचा इशारा दिला आहे.

याबाबत तक्रारदार तथा सामाजिक कार्यकर्ते मनोज सदाशिव चौधरी यांनी शुक्रवारी (ता. १३) दुपारी शासकीय विश्रामगृहात पत्रकार परिषदेत माहिती देताना सांगितले की, सन २०१७ मध्ये आमदार सुरेश धस यांच्या पत्नीच्या विरोधात जिल्हा परिषदेच्या मुर्शदपूर (आष्टी) गटातून त्यांची पत्नी माधुरी यांनी निवडणूक लढविली होती. याचा राग मनात ठेवून आमदार धस हे त्यांचे नुकसान करण्याचा प्रयत्न करीत असल्याचा आरोप चौधरी यांनी केला आहे.

चौधरी कुटुंबीयांचे बीड-नगर रस्त्यालगत तालुक्यातील पांढरी येथे २० आर अकृषिक क्षेत्र आहे. येथे हॉटेल बांधकामासाठी त्यांनी कंपाऊंड वॉल तसेच काही बांधकाम करून साहित्य ठेवले होते. या जागेतून पूर्वी लघुसिंचन तलाव कालवा गेलेला होता. तो सध्या अस्तित्वात नाही. परंतु कुटुंबाचे नुकसान व्हावे म्हणून आमदार धस यांनी सिंचन कार्यालय व तलाठी यांच्याशी संगनमत करून नऊ गुंठे जमीन कमी-जास्त पत्रकाआधारे कमी केली. याबाबत आपण न्यायालयात अपील केलेले आहे, असेही चौधरी यांनी सांगितले.

दरम्यान, मागील महिन्यात आ. धस यांनी समर्थकांसह येऊन हे क्षेत्र अतिक्रमणात येते असे सांगत बळजबरीने येथे जेसीबीद्वारे तोडफोड करून मोठे आर्थिक नुकसान केले. त्याबाबत ता. २४ जुलै रोजी आष्टी पोलिसांत फिर्याद दिली असून, धस यांच्यासह सुमारे ३८ जणांवर गुन्हा दाखल झालेला आहे. त्याच कारणावरून अज्ञात लोकांनी परत आमच्या जागेत येऊन मालमत्तेचे पुन्हा नुकसान केले. याबाबतची तक्रार करण्यास गेलो असता आष्टी पोलिस तक्रार घेत नाहीत. त्यामुळे याबाबत मुख्यमंत्री, गृहमंत्री, पोलिस महासंचालक, विभागीय आयुक्त आदींना निवेदन दिले आहे, असे मनोज चौधरी यांनी पत्रकार परिषदेत सांगितले.