बीड: कोविडच्या संभाव्य तिसऱ्या लाटेच्या पार्श्वभूमीवर काहीही तयारी नाही. बालकांसाठी बेड नाहीत, बालरोग तज्ज्ञांची नेमणूक नाही. पाठपुरावा करूनही आरोग्यमंत्र्यांनी याचे साधे उत्तरही दिले नाही. राजेश टोपे (rajesh tope) हे राज्याचे नाही तर जालना जिल्ह्याचे आरोग्यमंत्री असल्याचा टोला, भाजप आमदार सुरेश धस (suresh dhas) यांनी शुक्रवारी (ता. १८) आढावा बैठकीनंतर लगावला.

मुंबई, पुणे, कोल्हापूरला भरपूर लशी उपलब्ध करून दिल्या जातात. जालन्यालाही पुरेशा लस भेटतात. पण, बीड जिल्ह्यालाच लस कमी उपलब्ध करून दिल्या जात असल्याचेही सुरेश धस म्हणाले. सारखे केंद्राकडे बोट दाखविणारे सरकार आहे. बीड जिल्ह्याचा डेथ रेट चारपेक्षा अधिक असून राज्यात सर्वाधिक असल्याचा आरोपही त्यांनी केला.

प्रशासनाकडून सांगितली जाणारी २.६५ टक्के ही आकडेवारी चूक असल्याचेही ते म्हणाले. आमदार स्थानिक निधीतून रुग्णवाहिकांसाठी निधी उपलब्ध करून देऊनही खर्चास मंजुरी नसल्याचा आरोपही त्यांनी केला. कांदा बियाणांच्या किमती वाढवून शेतकऱ्यांची लूट केली जात असल्याचेही सुरेश धस म्हणाले. पीक कर्ज वाटपही संथ गतीने आहे. पीक विम्याचा बीड पॅटर्न म्हणत असले तरी शेतकऱ्यांना एक रुपयाही भेटत नसल्याचा टोलाही त्यांनी लगावला.