रामनगर : जालना तालुक्यातील भिलपुरी येथील एका शेतकऱ्याच्या गायी चोरून नेताना वाहन चिखलात फसल्यामुळे चोरट्यांना धूम ठोकावी लागली. ही घटना मंगळवारी (ता.१४) रात्री घडली. मौजपुरी ठाण्यात याप्रकरणी गुन्हा दाखल करण्यात आला असून तीन लाख २५ हजार रुपयांचा मुद्देमाल जप्त करण्यात आला असल्याची माहिती पोलीस उपनिरीक्षक राकेश नेटके यांनी दिली.भिलपुरी येथील शेतकरी प्रकाश वसंतराव गोरे यांची पंचवीस हजार रुपये किमतीची पांढऱ्या रंगाची गाय मंगळवारी (ता.१४) रात्री नेहमीप्रमाणे गावाशेजारील गोठ्यात बांधलेली होती.

दरम्यान मध्यरात्री चोरट्यांनी ही गाय चारचाकी वाहनात घालून चोरून नेण्याचा प्रयत्न केला. चोरटे मानेगाव मार्गाने जात असताना निरखेडा गावाजवळ वळण घेताना वाहन चिखलात फसले. वाहन काढण्याच्या प्रयत्नात असताना झालेल्या आवाजाने शेजारील ग्रामस्थ जागे झाले. ग्रामस्थांची चाहूल आणि वाहन चिखलातून निघत नसल्याचे चोरट्यांच्या लक्षात आले. त्यामुळे चोरट्यांनी गायीसह वाहन जागेवरच सोडून पलायन केले. जागी झालेल्या ग्रामस्थांनी मौजपुरी पोलिसांना याबाबत माहिती दिली. माहिती मिळताच सहायक पोलिस निरीक्षक विलास मोरे, पोलिस उपनिरीक्षक राकेश नेटके यांनी पोलिस कर्मचाऱ्यांसह घटनास्थळाला भेट दिली. यामध्ये गायीसह चार चाकी वाहन असा एकूण तीन लाख २५ हजार रुपयांचा मुद्देमाल मौजपुरी ठाण्यात जप्त करण्यात आला आहे.