वसमत : नांदेड येथून वसमत येथे रात्रीच्यावेळी दुचाकीवर येत असताना वसमत येथील मोबाईल व्यावसायिकास अडवून तलवारीचा धाक दाखवून मारहाण केली तसेच मोबाईल साहित्यासह अंगावरील सोन्याचे दागिने लुटणाऱ्या तिघांना स्थानिक गुन्हे शाखेच्या विशेष पथकाने नांदेड येथून ताब्यात घेतले.

तसेच वसमतसह नांदेड जिल्ह्यात इतर पाच ठिकाणी वाटमारी केल्याची कबूली चोरट्यांनी दिली. केवळ बारा दिवसांत वाटमारी करणारी आंतरजिल्हा टोळी जेरबंद केल्याने समाधान व्यक्त केले जात आहे.

वसमत येथील मोबाईल व्यावसायिक कैलास कदम हा १९ आक्टोंबर २०२४ रोजी नांदेड येथे मोबाईल साहित्य खरेदी करुन रात्रीच्या वेळी दुचाकीवर वसमतकडे येत असताना आसेगाव जवळ तीन अज्ञात चोरट्यांनी तलवारीचा धाक दाखवून मारहाण करीत ९६ हजार रुपयाचा मुद्देमाल लुटल्याची घटना घडली होती.‌

सहायक पोलिस निरीक्षक अनिल काचमांडे, बिट जमादार श्री आडे यांनी घटनास्थळी भेट देऊन घटनेचा पंचनामा केला. याबाबत वसमत ग्रामीण पोलीस ठाण्यात गुन्हा दाखल करण्यात आला होता.‌ सदरील गुन्ह्यांचे गांभिर्य ओळखून जिल्हा पोलिस अधीक्षक श्रीकृष्ण कोकाटे यांनी स्थानिक गुन्हे शाखेचे पोलिस निरीक्षक विकास पाटील यांना सदर गुन्हा उघड करण्याच्या सुचना देऊन सहायक पोलिस निरीक्षक शिवसांभ घेवारे यांचे विशेष पथक नेमले होते.‌

विशेष पथकाने आरोपींची तांत्रिक माहिती घेऊन मिळालेल्या गोपनीय माहिती नुसार सदरील गुन्हा हा नांदेड येथील हरज्योतसिंघ चरणजितसिंघ बिंद्रा वय २२ वसरणी नांदेड, बलप्रितसिंघ भुपेंद्रसिंग कदंब वय २६ वसरणी नांदेड व रोहित मारोती जाधव वय २१ वसरणी नांदेड यांनी केल्याचे निष्पन्न झाले. मिळालेल्या माहितीवरुन या तिन्ही आरोपींना नांदेड येथून सिताफिने ताब्यात घेतले.

आरोपींची अधिक चौकशी केली असता त्यांनी वसमतसह नांदेड जिल्ह्यात इतर पाच ठिकाणी वाटमारी करुन जबरी चोरी केल्याची कबुली दिली. त्यांच्याकडून गुन्ह्यात वापरलेली दुचाकी, मोबाईल साहित्य असा १५०००० रुपयांचा मुद्देमाल जप्त करण्यात आला आहे.