फुलंब्री (जि.औरंगाबाद) : येथील आगारातून ग्रामीण भागात जाणाऱ्या बसचा प्रवास खड्डेमय रस्त्यांमुळे प्रवाशांना त्रासदायक ठरत आहे, औरंगाबाद-जळगाव या मार्गावर मोठे खड्डे पडल्याने वाहनचालकांसह प्रवासी वैतागले आहेत. औरंगाबाद-जळगाव या राष्ट्रीय महामार्गाचे काम सुरू आहे. त्यामुळे या मार्गावरून प्रवास करणे जिकिरीचे ठरत आहे.

औरंगाबाद, सिल्लोड आगारातून किंवा जळगाव, जामनेर आगारांमधून या मार्गावर धावणाऱ्या अनेक बस खिळखिळ्या झाल्या आहेत. बसच्या खिडक्‍यांच्या तावदानांचा खडखडाट, खड्ड्यांमुळे प्रवाशांची डोकेदुखी ठरू लागला आहे. बहुतांश बसचे पत्रे तुटलेले आहेत. त्यामुळे अशा भंगार वाहनांचा प्रवास नको रे बाबा, असे म्हणण्याची वेळ प्रवाशांवर आली आहे. राज्य परिवहन मंडळाच्या बसचे टायर खराब होण्याचे प्रमाण वाढले आहे. रस्त्यांच्या दुरवस्थेमुळे केवळ वाहनेच नाही तर या वाहनांमधून नियमित प्रवास करणाऱ्या प्रवाशांची हाडे देखील खिळखिळी होऊ लागल्याचे प्रवासी सांगत आहेत. या प्रकारामुळे घरगुती वाहनांमधून प्रवास करणारे अनेक प्रवासी औरंगाबाद-जळगाव आदी भागांत जाण्याकरिता मार्ग बदलून जात आहेत.

हेही वाचा - वाहनांचे सुटे भाग चाेरणारी टाेळी जेरबंद, दाेन लाखांचा मुद्देमाल जप्त

जुनाट वाहने रस्त्यावर
औरंगाबाद-जळगाव या महामार्गावर वेगवेगळ्या आगारांमध्ये जुनाट झालेली वाहने वापरली जात आहेत. जुन्या वाहनांची दुरुस्ती करून ती पुन्हा रस्त्यावर आणली जातात. जिल्ह्यातील शहरी व ग्रामीण भागातील सर्वच रस्त्यांवर खड्डे व रस्तानिर्मितीच्या कामामुळे झालेली दुरवस्था पाहता त्या रस्त्यांवरून गाडी चालवण्याची इच्छा होत नाही; पण नाइलाजास्तव अशा बस आम्हाला चालवाव्या लागतात, अशा प्रतिक्रिया एसटीच्या चालकांनी नाव न घेण्याच्या अटीवर व्यक्त केल्या.

हेही वाचा - मारु नका, सर्व देताे, चाेरट्यांना विनंती

इंधनाची बचत नाही
परिवहन मंडळाकडून इंधन बचतीचा मंत्र वारंवार देण्यात येतो. आम्हीसुद्धा तसा प्रयत्न करीत असतो; पण जिल्ह्यातील ग्रामीण भागातल्या रस्त्यांची अवस्था इंधन बचतीच्या कार्याला अडथळा ठरली आहे. त्यामुळे मोठ्या प्रमाणात प्रवासी वाहतुकीवर इंधन खर्ची पडत असल्याचे परिवहन महामंडळाचे चालक खासगीत सांगत आहेत.