उस्मानाबाद: तुळजापूर तालुक्याचे माजी आमदार सि. ना. आलुरे (c.n. alure pass away) (गुरुजी) ( 90) यांचे आज सोमवारी पहाटे साडेतीनच्या सुमारास निधन झाले. सोलापूर येथील अश्विनी रुग्णालयात गेल्या आठ दिवसांपासून त्यांच्यावर उपचार सुरू होते. आज दुपारी तीन वाजता त्यांच्या पार्थिवावर अंत्यसंस्कार करण्यात येणार आहेत.

माजी आमदार सि. ना. आलुरे हे गुरुजी या टोपण नावाने परिचित होते. राजकीय, सामाजिक, सहकार आणि शैक्षणिक क्षेत्रात त्यांनी आपला ठसा उमटवला. काँग्रेस पक्षाचे एक निष्ठावंत सहकारी म्हणून अनेक वर्षे त्यांनी काम केलं. 1980 ला ते आमदारही झाले. शेतकरी कामगार पक्षाचे तत्कालीन आमदार माणिकराव ठाकरे यांचा पराभव करून ते आमदार झाले. सहकार क्षेत्रांमध्येही त्यांचे मोठे योगदान आहे. तुळजाभवानी सहकारी साखर कारखान्याची पायाभरणी त्यांच्याच कार्यकाळात झाली.

काँग्रेसचे ज्येष्ठ नेते माजी आमदार मधुकरराव चव्हाण यांचे एकनिष्ठ सहकारी म्हणून तालुक्यात ओळखले जात. अनेक सहकारी संस्था या गुरुजींच्या कार्यकाळात उदयाला आल्या. शैक्षणिक क्षेत्रामध्ये त्यांचे भरीव योगदान आहे. शिक्षण प्रसारक मंडळ अणदूरच्या माध्यमातून त्यांनी तालुक्याच्या विविध भागांमध्ये शिक्षणाचे जाळे पसरवले आहे. लातूर येथील बसवेश्वर कॉलेजच्या निर्मितीतही त्यांचे मोठे योगदान होते. त्यांनी कॉलेजच्या संस्थेवर उपाध्यक्ष म्हणूनही काम पाहिले. सिद्धेश्वर सहकारी बँक (लातूर)चे संस्थापक अध्यक्ष होते.