उमरगा : उमरगा - लोहारा तालुका काँग्रेस समितीच्या वतीने इंधन दर वाढ आणि महागाई निषेधार्थ, केंद्र सरकारच्या विरोधात शुक्रवारी राष्ट्रीय महामार्गावर काँग्रेस समिती कार्यालयासमोर प्रदेश कॉंग्रेसचे कार्याध्यक्ष बसवराज पाटील यांच्या नेतृत्वाखाली मोठे आंदोलन करण्यात आले. दरम्यान टाळ मृदंग, हलगीच्या निनादात आडवी दुचाकी आणि गॅस सिलेंडरला पुष्पहार घालुन अनोखे आंदोलन करण्यात आले.

संपूर्ण देशात महागाईने उच्चांक गाठला आहे. पेट्रोल, डिझेलची दरवाढ केंद्र सरकारच्या कृपेने झालेली आहे. महागाई कमी करण्यासाठी कोणतेही धोरणात्मक निर्णय घेण्यात केंद्र सरकार अपयशी ठरले आहे. गॅस सिलेंडरचे दर वरचेवर वाढत असल्याने गृहिणींच्या किचनचे अर्थ गणितच बिघडले आहे. महागाईने सर्वसामान्यांसमोर उदरनिर्वाहाचा प्रश्न निर्माण झाल्याने काँग्रेसच्या वतीने केंद्र सरकारच्या निषेधार्थ आंदोलन करण्यात आले.

या वेळी जिल्हाध्यक्ष धीरज पाटील, युवक काँग्रेसचे प्रदेश उपाध्यक्ष शरण पाटील, काँग्रेसचे प्रदेश सचिव दिलीप भालेराव, जिल्हा कार्याध्यक्ष प्रकाश आष्टे, तालुकाध्यक्ष अँड. सुभाष राजोळे, युवक काँग्रेसचे विजय वाघमारे, एम. ओ. पाटील, विजय दळगडे, महिला काँग्रेसच्या तालुकाध्यक्ष संगिता कडगंचे, युवक काँग्रेसच्या सचिव तन्नय्या कडगंचे, संगीता पाटील, सुवर्णा भालेराव, प्रेमलता टोपगे युवक काँग्रेसचे जिल्हाध्यक्ष चंद्रशेखर पवार, विजयकुमार सोनवणे, विठ्ठलराव बदोले, नानाराव भोसले, विठ्ठलराव पाटील, मदन पाटील, गोविंद पाटील, महालिंग बाबशेट्टी, विक्रम मस्के, योगेश राठोड, अनिल उर्फ पप्पू सगर, सचिन पाटील, रफीक तांबोळी, नगरसेवक दिपक मुळे, ॲड. विरसंगप्पा आळंगे, धनराज हिरमुखे, रशीद शेख, याकुब लदाफ, हरी लोखंडे, विक्रम मस्के, महेश माशाळकर, बनसोडे, शिवाजी गायकवाड, सोहेल इनामदार आदी पदाधिकारी उपस्थित होते.

" इंधनाची झालेली प्रचंड दरवाढ आणि महागाईने सर्वसामान्य नागरिकांना आर्थिक फटका बसतो आहे. केंद्र सरकारकडून महागाई कमी करण्यासाठी कसल्याही उपाययोजना केल्या जात नाहीत. अनेक फसव्या घोषणा करून केंद्र सरकार नागरिकांची दिशाभूल करीत आहे. महागाई कमी करण्याचा प्रयत्न झाला नाही, यापुढेही काँग्रेस पक्षाकडून उग्र आंदोलन केले जाणार आहे."

- बसवराज पाटील, कार्याध्यक्ष प्रदेश काँग्रेस