जालना, छत्रपती संभाजीनगर : दिवसा उन्हाच्या बऱ्यापैकी झळा आणि सायंकाळनंतर थंडी, असे आठवडाभर वातावरण असताना सोमवारी (ता. २६) छत्रपती संभाजीनगर आणि जालना जिल्ह्याच्या काही भागांत अवकाळी पाऊस झाला. भोकरदन तालुक्यात वीज पडून दोघांचा मृत्यू झाला.

मराठवाड्याच्या काही भागांत वादळी वाऱ्यासह पावसाचा अंदाज हवामान विभागाने वर्तविला होता. छत्रपती संभाजीनगर व जालना जिल्ह्यांत आज काहीसे ढगाळ वातावरण होते. उन्हाची तीव्रता फारशी नव्हती. जालना जिल्ह्यातील भोकरदन, अंबड, शहागड, अंकुशनगर, गोंदी, वडिगोद्री, टेंभुर्णी व पारधसह अन्य काही गावांत सायंकाळी वादळी वारा व विजांच्या कडकडाटासह अवकाळी पाऊस व गारपीट झाली.

वादळामुळे काही घरांवरील पत्रे उडाले. त्यामुळे शेतकऱ्यांची धांदल उडाली. रब्बीतील काही पिकांना या वादळ, पावसाचा फटका बसण्याची शक्यता आहे. छत्रपती संभाजीनगर तालुका, फुलंब्री, कन्नड, सिल्लोड तालुक्यांमधील काही गावांत वादळी वाऱ्यासह तुरळक पाऊस झाला. भोकरदन तालुक्यात वीज कोसळून दोन शेतकऱ्यांचा जागीच मृत्यू झाला. त्यात एका शेतकरी महिलेचा समावेश आहे.

शिवाजी गणपत कड (वय ३८, रा. सिपोरा बाजार) व अर्चना ऊर्फ पल्लवी विशाल दाभाडे (२१, रा. कुंभारी) अशी मृतांची नावे आहेत. शिवाजी कड हे सायंकाळी साडेसहाच्या सुमारास गोठ्यात जनावरे बांधण्यासाठी घराबाहेर पडले. यावेळी अंगावर वीज कोसळून त्यांचा जागीच मृत्यू झाला. त्यांच्या पश्चात पत्नी, दोन मुली व मुलगा असा परिवार आहे. पाऊस सुरू झाल्याने कुंभारी येथील अर्चना ऊर्फ पल्लवी दाभाडे या शेतातून घरी परतत होत्या. त्याचवेळी अंगावर वीज कोसळल्याने त्यांचा मृत्यू झाला. त्यांच्या पश्चात पती व दोन वर्षांचा मुलगा असा परिवार आहे.