वैजापूर - हुंड्यासाठी सासरच्या लोकांनी विवाहितेचा गळा दाबून खून केल्याची धक्कादायक घटना वैजापूर तालुक्यातील वीरगाव पोलिस ठाण्याच्या हद्दीतील कापुसवाडगाव येथे रविवारी (ता.१२) सकाळी उघडकीस आली. दरम्यान, ऐन दिवाळीच्या दिवशी ही दुर्दैवी घटना घडल्याने परिसरात हळहळ व्यक्त केली जात आहे.

भारती संतोष थोरात (वय ३६) असे मृत विवाहितेचे नाव आहे. याप्रकरणी संतोष दिनकर थोरात (पती), दिनकर माणिकराव थोरात (सासू), रंजना दिनकर थोरात (सासू) अशी गुन्हा दाखल करण्यात आलेल्यांची नावे आहेत. पोलिसांनी या तिघांनाही ताब्यात घेतले आहे. वीरगाव पोलिसांनी दिलेल्या माहितीनुसार, वैजापूर तालुक्यातील भायगाव गंगा येथील भारती हिचे कापूसवाडगाव येथील संतोष दिनकर थोरात याच्याशी १२ वर्षापूर्वी लग्न झाले होते.

लग्नामध्ये दीड लाख रुपये हुंडा, सोन्याचे दागिने, संसारपयोगी वस्तु देण्यात आल्या. मात्र, लग्नानंतर पाच ते सहा महिन्यांनी सासरच्या मंडळींनी पैशासाठी भारतीचा छळ सुरू केला. माहेराहून पैसे घेऊन ये, अशी मागणी तिच्याकडे करण्यात येत होती. पैसे न आणल्याने शनिवारी रात्री झोपेतच तिचा गळा दाबून खून करण्यात आला.

सकाळी या विवाहितेला आठ वाजता वैजापूर येथील उपजिल्हा रुग्णालयात दाखल करण्यात आले. मात्र, डॉक्टरांनी तपासून ती मृत असल्याचे सांगितले.

या प्रकरणी भारती हिचा भाऊ ज्ञानेश्वर भगवान कदम यांनी दिलेल्या फिर्यादीवरून भारतीचा पती, सासरा, सासू या तिघांविरुद्ध वीरगाव पोलिस पोलिस ठाण्यात खुनाचा गुन्हा दाखल करण्यात आला असून अधिक तपास वीरगाव पोलिस करीत आहेत. भारती या विवाहितेच्या पश्चात मुलगा, मुलगी असा परिवार आहे.