नांदेड - शहरातील पिरबुऱ्हानगर भागात कोरोनाचा रुग्ण बुधवारी (ता. २२) आढळून आल्यामुळे सर्वांनाच सतर्क रहावे लागणार आहे. त्यामुळे नांदेडकरांनो घाबरु नका, मात्र सावध राहा...प्रशासनाच्या सूचनांचे पालन करा, असे आवाहन नांदेडचे जिल्हाधिकारी डॉ. विपीन, महापालिका आयुक्त डॉ. सुनिल लहाने आणि पोलिस अधीक्षक विजयकुमार मगर यांनी केले आहे. 

कोरोनाबाधीत व्यक्तींच्या संपर्कात आलेल्या व्यक्तींना कोरोनाची लागण होऊ शकते. त्यामुळे नागरिकांनी सामाजिक अंतर (सोशल डिस्टन्सिंगचे) पालन करावे, वारंवार हात स्वच्छ धुवावे, अत्यावश्यक कामांसाठी बाहेर पडतांना मास्क किंवा स्वच्छ धुतलेल्या रुमालाचा वापर करावा, असे आवाहन जिल्हा प्रशासनातर्फे करण्यात आले आहे. 

हे ही वाचा - नांदेडला पंजाबहून आलेल्या यात्रेकरुंचा प्रवासाचा मार्ग मोकळा...

नागरिकांच्या हालचालीवर बंधने
महिनाभरापासून ‘ग्रीन झोन’मध्ये असलेल्या नांदेड जिल्ह्यात आता कोरोनाचा रुग्ण आढळून आला आहे. नांदेड महापालिका हद्दीत पिरबुऱ्हाणनगरला कोव्हीड - १९ चा रुग्ण आढळून आला आहे. त्यामुळे आता नियमानुसार पिरबुऱ्हाणनगर व लगतचा परिसर सहयोगनगर, अशोकनगर, भाग्यनगर, वृंदावन कॉलनी, उदयनगर, शास्त्रीनगर, टिळकनगर, विद्युतनगर, अंबेकरनगर व इंदिरानगर या क्षेत्रामध्ये रोगाचा इतरत्र प्रसार होऊ नये, म्हणून हे क्षेत्र कन्टेनमेंट झोन (Containmet Zone) म्हणून घोषित करण्यात आले आहे. त्याचप्रमाणे तेथील नागरिकांच्या हालचालीवर बंधने घालण्यात आली आहेत. 

‘मास्क’ नसेल तर होणार दंड 
जाहिर करण्यात आलेल्या कन्टेनमेंट झोनमध्ये कोणत्याही नागरिकांने शासनाने ठरवून दिलेल्या नियमांमध्ये नमुद केल्यानुसार अत्यावश्यक कामाशिवाय, वैध कागदपत्राशिवाय व आवश्यक कारणाशिवाय तसेच मास्क न घालता बाहेर निघाल्यास त्यांच्या विरुद्ध दंडनीय कारवाई करण्यात येईल, याची नोंद घ्यावी.
कन्टेनमेंट झोनमधील दहा हजार नागरिकांची तपासणी पूर्ण करण्यात आली असून यापुढे महापालिकेच्या यंत्रणेमार्फत १४ दिवस तपासणी करण्यात येणार आहे. 

हेही वाचलेच पाहिजे - Video-पुस्तक दिन : जाणून घ्या वाचनाचं महत्त्व

दोन दवाखाने सील, डॉक्टर, कर्मचारीही क्वारंटाईन 
हा परिसर सील करण्यात आला असून आरोग्य आणि पोलिस विभागातर्फे खबरदारी घेण्यात येत आहे. नागरिकांनी देखील आता आपआपल्या घरीच राहून प्रशासनाला सहकार्य करावे. कारण आता लॉकडाउन आणखी कडक करण्यात येणार आहे. रुग्ण चांगला असून त्याच्यावर उपचार सुरु आहेत. आरोग्य विभाग काळजी घेत आहे. तसेच कोरोना बाधीत व्यक्तीने खासगी दवाखान्यामध्ये तपासणी केल्यामुळे तेथील दोन दवाखान्यातील डॉक्टरांना व तेथील कर्मचाऱ्यांना क्वारंटाईन करण्यात आले आहे. सदर दोन्ही दवाखाने सील करण्यात आले आहेत. जनतेने घाबरुन न जाता, घरातच राहून कोरोना विरुद्धच्या लढ्यात सहकार्य करावे, असे आवाहन जिल्हा प्रशासनाच्यावतीने करण्यात आले आहे.