जालना- मनोज जरांगे यांचे उपोषण शनिवारपासून सुरू होणार आहे.पण, जरांगे यांच्या उपोषणाला पोलिसांनी परवानगी नाकारली आहे. अंतरवली सराटी आणि आजूबाजूच्या ग्रामस्थांनी जिल्हाधिकाऱ्यांना निवेदन देऊन आंदोलन करण्यास परवानगी देऊ नये अशी विनंती केली होती. याची दखल पोलिसांनी घेतली असून जरांगेंच्या उपोषणाला परवानगी नाकारली आहे.

जातीय सलोखा आणि शाळा-रहदारीला अडथळा निर्माण होऊ शकतो. त्यामुळे मुलं आणि महिलांना त्रास होतो, असं पोलिसांकडून सांगण्यात आलंय. ग्रामस्थांनी दिलेल्या निवेदनात म्हटलं होतं की, गावातील जातीय सलोखा बिघडत असल्याने याला परवानगी देऊ नये. जिल्हाधिकाऱ्यांनी याची दखल घेतलीये. पोलिसांनी जरांगे यांच्या उपोषणाला परवानगी नाकारली आहे.

सगे-सोयरे यांना देखील कुणबी प्रमाणपत्र मिळावे या मागणीसाठी मनोज जरांगे पाटील हे उपोषणाला बसणार आहेत. याआधीच त्यांनी उपोषणाला बसणार असल्याचं ठरवलं होतं. पण, लोकसभेमध्ये राज्यात आचारसंहिता लागली असल्याने त्यांना आंदोलन करता आलं नाही. त्यांनी ८ जून रोजी उपोषण करणार असल्याचं जाहीर केलं होतं. त्यामुळे सरकारची डोकेदुखी वाढली होती. सरकार मनोज जरांगे पाटील यांची कशी मनधरणी करतं हे पाहावं लागणार आहे.

अंतरवली सराटी गावातील ग्रामस्थांनी देखील मनोज जरांगे पाटील यांच्या या उपोषणाला विरोध केला आहे. जरांगेंच्या उपोषणामुळे गावात मोठे गर्दी होते, याशिवाय जातीय सलोख बिगडतो. त्यामुळे त्यांना उपोषण करण्यापासून रोखावं अशी विनंती ग्रामस्थांनी ३ जून रोजी जिल्हाधिकाऱ्यांकडे केली होती. यासाठी जिल्हाधिकाऱ्यांना निवेदन देण्यात आलं होतं.

आता पोलिसांनी त्यांना उपोषणाला परवानगी नाकारली असली तरी मनोज जरांगे उपोषण घेण्यावर ठाम असल्याची माहिती मिळत आहे. त्यामुळे जरांगे पाटील उद्या गावात उपोषणाला बसले तर पोलीस कोणती भूमिका घेणार हे पाहणं महत्त्वाचं ठरणार आहे.