हिंगोली - मशिदीवरील भोंग्यांवरून गेल्या काही दिवसांपासून राज्यभर वाद सुरू आहे. परंतु, या वादाला फाटा देत सामाजिक सलोखा जपण्यात आला आहे. जिल्ह्यातील केंद्रा बुद्रुक, ता. सेनगाव येथील हिंदू बांधवांनी विठ्ठल रुख्मिनी मंदिरामध्ये रोजा धरणाऱ्या मुस्लिम बांधवांसाठी सोमवारी ता. १८ इफ्तार पंगतीचे आयोजन करण्यात आले होते. यावेळी मंदिराच्या सभामंडपात मुस्लिम बांधवांसाठी रोजा सोडण्याची व्यवस्था करण्यात आली होती. सामाजिक सलोखा जपणाऱ्या गावच्या या उपक्रमाचे कौतुक होत आहे.  केंद्रा बुद्रचक येथे सोमवारी पवित्र रमजानच्या महिन्यात रोजा असणाऱ्या मुस्लिम बांधवांसाठी इफ्तार पंगतीचे आयोजन करून धार्मिक विद्वेषाला गावकरी कधीच बळी पडणार नाही, असा संदेशच देण्यात आला आहे.

हिंगोली जिल्ह्यात केंद्रा बुद्रुक गाव विधायक कामांमध्ये नेहमीच अग्रेसर असते. गेल्या ३८ वर्षांपासून गावात एक गाव एक गणपती,ही परंपरा कायम आहे. या उत्साहात सर्व जाती धर्माचे लोक सहभागी होतात. गावातील प्रत्येक हिंदू सण-समारंभात मुस्लिम बांधवही मोठ्या संख्येने सहभागी होत असतात. शिवाय अखंड हरिनाम सप्ताहाच्या आजोनामध्येही मुस्लिम बांधवांकडून सहभाग घेतला जात असतो. गेल्या काही दिवसांपासून राज्यात मशिदीवरील भोंग्यावरून राजकारण रंगताना पाहायला मिळत आहे. परंतु, यामुळे कायदा सुव्यवस्थेबाबत सर्वसामान्य लोकांमध्ये चिंतेचे वातावरण आहे. अशातच केंद्रा बुद्रुक येथील हिंदू गावकऱ्यांनी रमजानच्या रोजेदारांसाठी इफ्तार पंगतीचे आयोजन करून गावकऱ्यांनी सणसणीत चपराक देत सामाजिक ऐक्याचा संदेश दिला आहे. या कार्यक्रमाच्या आयोजनासाठी जिल्हा परिषदेचे माजी उपाध्यक्ष अनिल पतंगे, शिवाजीराव सरनाईक,दिपक सरनाईक शिवराज सरनाईक, नारायणराव केंद्रेकर,अक्त्तर शेख, सज्जू शहा,प्रकाश डांगे, राजेश खंदारे, यांनी पुढाकार घेतला.