खुलताबाद : खुलताबादमधील सुलीभंजन येथे रिल्स शूट करणे एका तरुणीच्या जिवावर बेतले. रिल्स शूट करताना क्लच ऐवजी चुकून एक्सलेटवर पाय ठेवल्याने कार थेट दरीत कोसळली. या घटनेचा व्हिडिओ सोशल मीडियावर व्हायरल होत आहे.

छत्रपती संभाजीनगर येथील हनुमान नगर परिसरात राहणारी श्वेता सुरवसे ही २३ वर्षीय तरुणी तिच्या मित्रासह सुलीभंजन येथील दत्त मंदिरात गेली होती.

दत्तधाम मंदिर परिसरात मोबाईलवर रिल्स बनविणारया युवतीला आपला प्राण गमवावा लागला. शिवराज संजय मुळे (वय 25) असे तिच्या मित्राचे नाव आहे. सोमवारी दुपारी दत्त मंदिर परिसरात आल्यानंतर श्वेताला रिल्स शूट करण्याचा मोह आवरता आला नाही.

मी कार चालवून बघते, तू व्हिडिओ शूट कर अस तिने मित्राला सांगितले. मात्र, कार चालवत असताना श्वेताच्या हातून रिव्हर्स गिअर पडला. यानंतर तिने क्लच ऐवजी चुकून एक्सलेटरवर पाय ठेवला आणि गाडी थेट दरीत साधारण ५०० फुट खोल कोसळली. तिचा मित्र मदतीला धावला, पण तोवर कार दरीत कोसळली होती. या अपघातात श्वेताचा मृत्यू झाला आहे. ही सर्व घटना कॅमेऱ्यात कैद झाली आहे.

सुलीभंजन येथील दत्त मंदिराचा परिसर विहंगम असून पावसाळ्यात परिसरातील निसर्ग सौंदर्य आणखी खुलते. त्यामुळे पावसाळा सुरू झाला की पर्यटकांची पावले या भागाकडे वळतात. मंदिर परिसरातील या सौंदर्य निरीक्षण स्थळावर कठडे असते तर ही घटना घडली नसती असे स्थानिकांचे म्हणणे आहे.