मांडवी (नांदेड): येथून जवळच असलेल्या नागापूर (ता.किनवट) येथे तीन महिन्यांपासून तीव्र पाणीटंचाई निर्माण झाली आहे. अनेक निवेदने देऊनही पाणी पुरवठा सुरू न झाल्यामुळे संतप्त झालेल्या महिलांनी सोमवारी (ता.३१) ग्रामसेवकास ग्राम पंचायत कार्यालयातच डांबले होते.

गावातील नळ योजनेचे काम गेल्या अनेक दिवसांपासून रेंगाळले असून त्यामुळे गावात तीव्र पाणी टंचाई निर्माण झाली आहे. पाण्यासाठी महिला मंडळींना आणि लहानग्यांना पाण्यासाठी भटकावे लागत आहे. हातावर पोट असणाऱ्या लोकांना मजुरी बुडवून पाणी जमा करावे लागत आहे. मागील काही दिवसांपासून ग्रामसेवक गजानन राऊलवार हे सतत गैर हजर राहत होते. १४ व्या वित्त आयोगाचे पैसे उचल केले असून त्यातून पाणीटंचाई दूर करावी म्हणून गावकऱ्यांनी ठराव घेतला. परंतू ग्रामसेवकाने त्यालाही केराची टोपली दाखविली असून दोन महिन्यांपासून नागापूर गावात येणे जाणे बंद केले होते.

गावकऱ्यांनी गटविकास अधिकारी किनवट याना निवेदन देऊन म्हटले होते की, ग्रामसेवकाच्या भ्रष्टाचाराची चौकशी करून कार्यवाही करावी व गावातील पाणीटंचाई दूर करण्याची मागणी केली होती. परंतु त्यांनीही याकडे दुर्लक्ष केल्याचा आरोप गावकऱ्यांनी केली आहे. ता.३१रोजी ग्रामसेवक गावात आल्याची माहिती मिळताच दीडशे ते दोनशे महिला ग्रामपंचायत कार्यालयात जमा झाल्या व पाणीटंचाई विषयी ग्रामसेवकास प्रश्नांचा भडिमार केला.

परंतु ग्रामसेवकाने उडवा-उडवीचे उत्तर दिल्यामुळे संतप्त महिलांनी त्यांना ग्रामपंचायत कार्यालयात डांबून कुलूप लावले. गटविकास अधिकारी आल्या शिवाय कुलूप काढणार नाही, असा पवित्रा घेतला होता. ही माहिती मांडवी पोलिसांना कळताच सहाय्यक पोलिस निरीक्षक मल्हार शिवरकर याना मिळताच त्यांनी नागापूर येथे जाऊन महिलांची समजूत काढून पाणीटंचाई दूर करण्यासाठी मी तुमच्या सोबत आहे, असे आश्वासन दिले तेंव्हा ग्रामसेवकाची सुटका झाली. ही समस्या केवळ नागापूर येथेच नसून परिसरात कोरोनाचा प्रभाव सुरू असताना सुद्धा अनेक गावचे ग्रामसेवक गैरहजर आहेत.