जालना : पावसाळा सुरू होऊन महिनाभराच्या प्रतीक्षेनंतर यंदाच्या पावसाळ्यात गुरूवारी (ता.सहा) जालनेकरांना जोरदार पावसाचा अनुभव मिळाला आहे. दुपारी सव्वाचार ते साडेचार वाजेनंतर एक तास पावसाच्या जोरदार सरी कोसळल्या. त्यामुळे शहरातील सखल भागात पावसाची पाणी साचले होते. शहरासह जिल्ह्यात ही ठिकठिकाणी पावसाने हजेरी लावली.

यंदा जिल्ह्यात मान्सून उशिरा दाखल झाला. त्यात शहरात मागील काही दिवसांपासून केवळ ढगाळ वातावरण आणि पावसाची भुरभुर होत होती. त्यामुळे उकाड्यात ही भर पडला होता. शिवाय वातावरणातील बदलामुळे डासांचे प्रमाण ही वाढले होते.

त्यामुळे जालनेकर उकाड्यासह डासांमुळे हैराण झाले होते. शिवाय जालनेकरांना मोठ्या पावसाची महिनाभरापासून प्रतीक्षा होती. गुरूवारी सकाळीच शहर पावसाची रिपरिप सुरू झाली होती. मात्र, अकरा वाजेनंतर पावसाने पुन्हा उघडीप दिली.

त्यानंतर साडेतीन वाजेच्या सुमारास पुन्हा रिमझिम पावसाला सुरवात झाली. काही वेळानंतर पावसाचा जोर वाढ गेल्याने सुमारे एक तास शहरात जोरदार पावसाच्या सरी कोसळल्या. मात्र, सायंकाळी साडेपाच ते पावणेसहा वाजे दरम्यान पावसाचा जोर कमी झाला.

मात्र, रात्री उशिरापर्यंत शहरात अधूनमधून पावसाची रिपरिप सुरू होती. गुरूवारी झालेल्या पावसाने जालनेकरांना यंदाच्या पावसाळ्यात पहिल्या पावसाचा अनुभव मिळाला. शिवाय उकाड्यापासून दिलासा ही मिळाला. अनेकजण हातात छत्री घेऊन, काहीजण रेनकोट परिधान करून मार्गक्रमण करताना दिसून आले.

विविध भागात नाल्या तुंबल्या

शहरात यंदाच्या पावसाळ्यात पहिलाच जोरदार पाऊस झाल्यानंतर शहरातील अनेक भागातील रस्त्यांवर पावसाचे पाणी साचले होते. याचे प्रमुख कारण म्हणजे शहरातील तुंबलेल्या नाल्यामुळे पाण्याच लवकर निचराच झाला नाही. त्यामुळे पहिल्याच पावसाचा नगरपालिकेच्या नालेसफाई मोहीम उघडी पडल्याचे चित्र पाहण्यास मिळाले.