परभणी : टाळेबंदीमुळे दोन वेळा लग्न सोहळा लांबणीवर पडला. परंतु, परिवारातील थोरा मोठ्याची तळमळ पाहून एका युवकाने प्रशासनाकडून दिलेल्या चाकोरीबद्ध आराखड्यात बसून थेट शेतातील बांधावरच मोजक्या पाहुण्यांच्या उपस्थितीत लग्नसोहळा उरकला. केवळ विवाह करून तो युवक घरी गेला नाही, तर लग्नानंतर लगेच गरजूंना धान्य व मास्कचे वाटप करून स्वतःच्या अर्धांगिनीसोबत सोमवारी (ता.चार) गृहप्रवेश केला.

हेही वाचा :  रेड झोनमधील व्यक्तींना ‘या’ जिल्ह्यात ‘नो एन्ट्री’
परभणीतील शंकरनगर भागातील किरण प्रकाश सपाटे या नववराचा विवाह सोमवारी रोहीपिंपळगाव (ता. मुदखेड, जि. नांदेड) येथील शीतल कचरू केळकर हिच्याशी आगळ्या-वेगळ्या वातावरणात पार पडला. नववर-वधूनी अनेक तांत्रिक व प्रशासकीय अडचणींचे सोपस्कार पार पाडीत जणू अग्निदिव्यच पूर्ण केल्याचे दिसून आले. सहा महिन्यांपूर्वी किरणचा विवाह शीतलशी ठरला होता. यापूर्वी सहा एप्रिल ही विवाहाची तारीख निश्‍चित झाली होती. त्यानंतरही एक तारीख निश्‍चित करण्यात आली. परंतु, लॉकडाउन वाढतच गेले आणि या विवाह सोहळ्याता मुहूर्त गाठता येईनासा झाला. घरातील ज्येष्ठांच्या प्रकृतीचा विचार करून किरण सातत्याने विवाहच्या दृष्टीने विचारात होता. त्याचा मित्र राष्ट्रवादी काँग्रेसच्या ओबीसी सेलचा जिल्हा सरचिटणीस कृष्णा कटारे यांच्याशी त्याने या संदर्भात चर्चा केल्यानंतर दोन मे रोजी ऑनलाइन अर्ज प्रशासनाकडे दाखल केला. मात्र, जिल्हा प्रशासनाने परवानगी नाकारली.

हेही वाचा : मराठवाड्यात उष्णतेची लाट तीव्र होणार

कोरोना टेस्टनंतर दिली परवानगी
दरम्यान, प्रशासनाकडे सर्व प्रकारची कबुली देत किरणसह सोबत जाणारे कृष्णा कटारे व कुणाल गायकवाड या तिघांनीही स्वतःची कोरोना टेस्ट केली. तिकडे मुलगी शीतलचीही कोरोना टेस्ट करण्यात आली. त्याचे अहवाल आल्यानंतर प्रशासनाने दिलेल्या परवानगीनुसार अगदीच पोलिस पाटील, सरपंच, मुलीचे आई, वडील व मुलाच्या दोन मित्रांसह हा सोहळा रोहीपिंपगळगाव येथील शेतात नियमांचे काटेकोरपालन करीत पार पडला.

गरजूंना किट वाटून गृहप्रवेश
नव वर-वधूनी लग्न सोहळा आटपल्यानंतर परभणीत पुन्हा एकदा स्वतःची वैद्यकीय तपासणी केली. महापालिकेच्या बेघर निवारात असलेल्यांना मास्कचे वाटप केले. ११ गरजू कुटुंबांना धान्याच्या किटचे वाटप करून गृहप्रवेश केला.