माजलगाव : उमेदवारी देणाऱ्या पक्षात प्रवेश करणार असून विधानसभा निवडणूक लढण्याचे रणशिंग भाजपाचे विधानसभा प्रमुख मोहन जगताप यांनी फुंकले. शहरातील जुना मोंढा भागातील मैदानावर आयोजित कार्यकर्ता निर्धार मेळाव्यात रविवारी (ता. २९) बोलत होते.

मेळाव्याच्या अध्यक्षस्थांनी छत्रपती कारखान्याचे अध्यक्ष बाजीराव जगताप हे होते तर माजी नगराध्यक्ष सहाल चाउस, अर्जुन गायकवाड, विलास बडे, श्रीकृष्ण सोळंके, डॉ. सुशील लोढा, संतोष यादव यांची उपस्थिती होती. बोलतांना श्री. जगताप म्हणाले की, मागील २० वर्षांपासून मतदारसंघामध्ये काम करत असताना ऐनवेळी डावलण्यात येते.

त्यामुळे आता आपण आगामी विधानसभा निवडणुकीत उमेदवारी देणाऱ्या पक्षात प्रवेश करणार असून उमेदवारी न मिळाल्यास जनतेच्या तिकीटावर लढणार असल्याचे सांगीतले तर विद्यमान आमदार सोळंके यांचेवर कडाडून टीका करत केवळ विकासाचे स्वप्न दाखवून मतदारसंघवासीयांचे प्रश्न कायमच ठेवले असल्याचे सांगीतले.

आठवडी बाजार, एमआडीसीमधील टेक्स्टाईल पार्क, पालिके अंतर्गत झालेली निकृष्ट दर्जाची कामे यासह विकासात्मक असलेली महत्वाची कामे झाली नसल्याचा आरोप केला. अध्यक्षीय समारोपात बोलतांना माजी आमदार बाजीराव जगताप यांनीही आगामी काळात मोहन जगताप यांचे पाठीशी रहावे, असे आवाहन केले.

यावेळी धारूरचे माजी नगराध्यक्ष अर्जुन गायकवाड, नानाभाउ शिंदे, शरद यादव, रामदीप डाके, बप्पासाहेब देशमुख, उमेश मोगरेकर यांनी मनोगत व्यक्त केले. आभार डॉ. सुशिल लोढा यांनी मानले.