बीड - महिला व मुलींच्या छेडछाडीच्या घटना वाढल्यामुळे पोलिस अधीक्षकांच्या पुढाकाराने जिल्ह्यात १२ दामिनी पथकांची स्थापना केली. २०१८ पासून आतापर्यंत छेड काढणाऱ्या साडेतीन हजार रोडरोमिओंना दामिनी पथकाने धडा शिकवला आहे. पथकाच्या माध्यमातून जिल्ह्यातील शाळा व महाविद्यालयांना आतापर्यंत चार हजार वेळेस भेटी देऊन मार्गदर्शन करण्यात आले आहे.

जिल्ह्यातील अनेक भागांतून महिला व मुली विविध कारणांसाठी शहरात येतात. मात्र, काही ठिकाणी रोडरोमिओंचे टोळके बसलेले असते. ये-जा करणाऱ्या महिलांना विविध समस्यांचा सामना करावा लागतो. पोलिस अधीक्षक जी. श्रीधर यांनी जिल्ह्यात १२ दामिनी पथकांची स्थापना केली आहे. २०१८ पासून आतापर्यंत ९७५ महिला बचत गटांना या पथकांनी कायद्याची माहिती दिली. शहरातील महत्त्वाच्या ठिकाणी पथकांनी गस्त वाढविली. आता महिला व मुलींना मोबाईलवरही तक्रारी देता येणार आहेत. पोलिस ठाण्यातही आता जाण्याची गरज नाही. तक्रादाराचे नाव गुपित ठेवण्यात येते. 

पोलिस अधीक्षक जी. श्रीधर, अपर पोलिस अधीक्षक विजय कबाडे, पोलिस उपअधीक्षक भास्कर सावंत यांच्या मार्गदर्शनाखाली पोलिस उपनिरीक्षक भारत माने, पोलिस उपनिरीक्षक राणी सानप यांच्या पथकाने कारवाया केल्या. 
महिला व मुलींच्या सोयीसाठी दामिनी पथकाकडे मोबाईलवर तक्रार करण्याची सोय आहे. तक्रारींची दखल घेऊन ताबडतोब कारवाया करण्यात येत आहेत.