लोकसभा 2019 
हिंगोली : हिंगोली लोकसभा मतदार संघातून उमेदवारी अर्ज भरण्याची तयारी करणाऱ्या माहूर येथील योगी शाम भारती महाराज यांना केंद्रीयमंत्री नितीन गडकरींच्या कार्यालयातून आलेल्या दुरध्वनीनंतर योगींनी माघार घेतली आहे. 

हिंगोली लोकसभा मतदार संघातून भाजपा कडून माहूर येथील योगी शाम भारती महाराज यांनी निवडणुक लढविण्याच्या हालचाली सुरु केल्या होत्या. त्यासाठी त्यांनी हिंगोली लोकसभा मतदार संघातून गावांमधून मागील एक वर्षापासून संपर्क देखील वाढविला होता. नांदेड, यवतमाळ येथील विधानसभा मतदार संघातून मतदारांच्या गाठीभेटीनंतर त्यांनी हिंगोली, वसमत व सेनगाव विधानसभा मतदार संघात भेटी देऊन कार्यकर्त्यांशी संवाद साधला होता.

दरम्यान, योगी शाम भारती महाराज यांच्या शिष्यांनीही त्यांना उमेदवारी दाखल करण्याची गळ घातली होती. त्यामुळे त्यांनी अपक्ष म्हणून 
उमेदवारी दाखल करणार असल्याचे स्पष्ट केले होते. त्यानंतर सोमवारी (ता. 25) रात्री उशीरा पर्यंत त्यांच्या समवेत शिष्यांच्या बै ठकाही झाल्या होत्या. मात्र रात्री केंद्रीय मंत्री नितीन गडकरी यांच्या कार्यालयातून दुरध्वनी आल्यानंतर योगी शाम भारती महाराज यांनी त्यांचा निर्णय बदलून उमेदवारी अर्ज दाखल न करण्याचे ठरविले.

या संदर्भात योगी शाम भारती महाराज यांनीही दुजोरा दिला असून केंद्रीय मंत्री नितीन गडकरींच्या कार्यालयातून दुरध्वनी आला होता. याशिवाय भाजपाच्या वरिष्ठ नेत्यांनीही युती असल्यामुळे युतीच्या उमेदवाराच्या पाठीशी राहण्याचे कळविल्याचे त्यांनी सांगितले.