निपाणी (उस्मानाबाद): येथील शेतकरी अशोक राजेंद्र गुंड (वय २९) यांनी (ता. २०) विषप्राशन करून आत्महत्येचा प्रयत्न केला होता. मंगळवारी (ता.२३) त्यांच्यावर हैदराबाद येथे उपचार सुरू असताना त्यांचा दुर्दैवी मृत्यू झाला आहे. अशोक गुंड हे सोयाबीन पिकाच्या नापिकीने हवालदिल झाले होते. विषप्राशन करण्यापूर्वी त्यांनी व्हिडिओ करून तो सोशल मेडियावर अपलोड केला होता. गुंड यांनी या व्हिडिओमध्ये प्रशासनाला विनंती केली होती. त्यामध्ये, शासनाने सोयाबीनचे पंचनामे करून पाहणी करावी. पाडोळी, शिराढोण, निपाणी शिवारातील पिके पावसाअभावी धुरळा (करपून) होऊन गेली आहेत. या पिकात जनावरे सोडण्याची पाळी शेतकऱ्यांना आली आहे. गेल्या २५ दिवसांपासून पाऊसासोबत लाईट नाही, याची प्रशासनाने लवकर दखल घ्यावी अशी विनंती केली होती.

स्वतःचा सोयाबीन उपटून टाकला असून, या प्लॉटमध्ये काहीही राहिले नाही असेही गुंड या व्हिडिओत म्हणताना दिसत आहेत. आता शेतकऱ्यांवर सोयाबीनमुळे उपासमारीची वेळ आली असून याकडे विमा कंपनी व शासनाने लक्ष देऊन पंचनाम्याची करण्याची गरज असल्याचेही त्यांनी व्हिडिओमध्ये मत मांडले होते. हा व्हिडिओ व्हायरल करूनही प्रशासनाला जाग आली नाही. अखेर या नैराश्यातून त्यांनी विषप्राशन केले.