जिंतूर : शेती अत्यल्प, निसर्गाच्या लहरीपणामुळे शेती व्यवसाय सतत तोट्यात येत आहे त्यात आरक्षण नसल्याने मुलामुलींचे शिक्षण, लग्न कर्तव्यांसह अनेक आर्थिक संकटांना सामोरे जाताना त्रस्त झालेल्या मराठा समाजातील तरुण शेतकऱ्याने शेतात गळफास लावून आत्महत्या केल्याची घटना जिंतूर तालुक्यात बामणी पोलीस ठाण्याच्या हद्दीत संक्राळा या खेड्यात सोमवारी (ता.०६) उघडकीस आली.

नातेवाईकांच्या माहितीवरून सायंकाळच्या सुमारास पोलीस ठाण्यात घटनेची नोंद करण्यात आली. ज्ञानेश्वर नानासाहेब पवार असे आत्महत्याग्रस्त शेतकऱ्याचे नाव आहे. सूत्रांच्या माहितीनुसार ज्ञानेश्वर पवार यांना अत्यल्प शेती असून त्यांच्यावरच कुटुंबाच्या पालनपोषणाचा भार होता.

यावर्षी पाऊसही कमी झाल्यामुळे शेती उत्पन्नात मोठ्या प्रमाणात घट झाली.शिवाय मराठा समाजाला आरक्षण नसल्यामुळे निर्माण झालेल्या आर्थिक संकटाच्या चक्रव्यूहात अडकलेल्या पवार यांनी शेतातील लिंबाच्या झाडाला गळफास घेऊन आपली जीवनयात्रा संपवली.

घटनेची माहिती नातेवाईकांना मिळताच त्यांना तत्काळ ग्रामीण रुग्णालयात दाखल केले असता डॉक्टरांनी तपासून मृत घोषित केले. बामणी पोलीस ठाण्याचे सहाय्यक पोलीस निरीक्षक कृष्णा घायवट सहकारी पोलीस कर्मचाऱ्यासह घटनास्थळी भेट देऊन पंचनामा केला. त्यानंतर पोलीस ठाण्यात घटनेची नोंद करण्यात आली.

सदरील घटनेवरून मनोज जरांगे पाटील यांच्या मागणीनुसार मराठा समाजाला आरक्षण किती गरजेचे आहे हे दिसून येते परंतु सरकार वेळकाढू पणा करत असल्यामुळे मराठा समाजात आत्महत्यांच्या घटना वाढत आहेत. मराठा समाज बांधवांना विनंती की आत्महत्तेसारखे टोकाचे निर्णय घेऊ नये, आईवडिल यांच्या संघर्षाचा विचार करा.मराठा आरक्षणाचा लढा सुरू आहे यात समाजाला यश मिळेल. निश्चीतच वेळ कठीण आहे परंतु ती निघुन जाईल तेंव्हा संयम बाळगावा.

- बालाजी शिंदे,सोसकर विभागीय अध्यक्ष संभाजी ब्रिगेड, जिंतूर.