उदगीर- निडेबन : अयोध्येतील राम मंदिरात मूर्ती प्रतिष्ठापनेची जय्यत तयारी सुरू आहे. त्यानिमित्त कर्नाटकातील किष्किंधा येथील तरुण अयोध्येला सायकलवर निघाला आहे. सुरेश कोटागोंडा (वय १८) असे त्याचे नाव आहे. वाटेतील मुक्काम तो संबंधित गावातील मंदिरात करीत आहे. तेथे रामनाम घेत रामाचे चित्र रेखाटतो आहे.

किष्किंधा येथून सात जानेवारीला सायकलवर निघालेला सुरेश हा गरीब परिवारातील आहे. आई- वडील, भाऊ असा त्याचा परिवार आहे. वडील मजुरी करतात भाऊ रिक्षा चालवतो. सुरेशला लहानपणापासून चित्रकलेची आवड असून यावरच त्याची उपजीविका अवलंबून आहे. धार्मिक कथा- कीर्तनाची आवड असल्याने तो चित्रेही देवांची काढतो. जय सियाराम लिहिलेला शर्ट, साधी पॅंट, गळ्यात रुद्राक्षाची माळ असा साधा पेहराव केलेला हा तरुण त्या-त्या गावांत लक्ष वेधतो.

प्रवासादरम्यान ज्या मंदिरात मुक्काम होणार असेल तेथील ग्रामस्थांना तो आपली माहिती सांगतो. मुक्कामाची विनम्रपणे परवानगी मागतो. मुक्काम मोफत न करता, संबंधित मंदिरात प्रभू श्रीरामाचे चित्र कोठे काढू, असे विचारून लगेच कामाला लागतो. चित्रकला पाहून कुणी पैसे देऊ केले तर तो ते नाकारत आहे.

फक्त जेवण, चित्र काढण्यासाठी रंगाची व्यवस्था करण्याची विनंती तो करीत आहे. येथील राम मंदिरात सुरेशचे आगमन झाले, त्यावेळी याची प्रचिती आली. या मंदिरात त्याने अत्यंत कमी वेळेत काढलेले श्रीरामाचे चित्र पाहून मंदिराचे विश्वस्त ॲड.अजय दंडवते आणि प्रमोद कुलकर्णी यांनी त्याचा सत्कार केला.

पुजारी हृषिकेश द्वैयंपायन, डॉ.भाऊसाहेब शेकपूरकर, बंडूनाना हुंडेकर, डॉ.संजय कुलकर्णी, धनंजय गुडसूरकर, श्रीकांत पोहरेगावाकर, निवृत्त नायब तहसीलदार धनेश दांताळे आदींनी त्याला पुढील प्रवासासाठी शुभेच्छा दिल्या आणि तो मार्गस्थ झाला.