बुलडाणा : होणार... होणार... म्हणून गेल्या पंधरा वर्षांपासून बुलडाण्यातील कृषी महाविद्यालयाचा मार्ग अडखळत होता. मात्र आमदार गायकवाड यांचे सातत्याने प्रयत्न व जोरकस पाठपुराव्यामुळे हा महाविद्यालयाचा मार्ग मोकळा झाला आहे.

मंत्रिमंडळाच्या बुधवारी (ता.२८) झालेल्या बैठकीत १४६ कोटी रुपयांच्या खर्चाच्या या महाविद्यालयाला मंजुरी मिळाली आहे.

त्यामुळे आता लवकरच बुलडाण्यात कृषी महाविद्यालय सुरू होईल, अशी अपेक्षा व्यक्त केली जात आहे. महाविद्यालयाच्या पूर्णत्वासाठी तातडीने प्रयत्न करून पुढील सत्रामध्ये प्रवेश प्रक्रिया सुरू होईल, असा विश्वास आमदार संजय गायकवाड यांनी व्यक्त केला आहे.

सुमारे पंधरा वर्षांपासून बुलडाणा या जिल्ह्याच्या ठिकाणी कृषी महाविद्यालय व्हावे, अशी मागणी जोर धरत होती. दरम्यानच्या काळात माजी मंत्री एकनाथराव खडसे पालकमंत्री असताना त्यांनी या कृषी महाविद्यालयासाठी प्रयत्न केले.

परंतु हे कृषी महाविद्यालय तळणी येथे करण्यासाठी त्यांनी जोरदार हालचाली केल्या. नंतरच्या काळात बुलडाण्यातील भाजपचे ज्येष्ठ नेते स्व. भाऊसाहेब फुंडकर हे कृषिमंत्री झाले व त्यांनी देखील महाविद्यालय जिल्ह्यात व्हावे, विशेषतः खामगावात व्हावे यासाठी प्रयत्न सुरू केले, मात्र दुर्दैवाने त्यांचे निधन झाल्याने हा प्रश्न रखडला होता.

नंतरच्या काळात या संदर्भात आमदार संजय गायकवाड यांनी गेल्या साडेतीन वर्षांपासून प्रयत्न सुरू केले. त्यांनी सातत्याने मुख्यमंत्र्यांकडे मागणी करून हा प्रश्न लावून धरला.

दोन महिन्यांपूर्वीच मुख्यमंत्री, उपमुख्यमंत्री या प्रस्तावाला सकारात्मक होते. दरम्यानच्या काळात काही त्रुटी पूर्ण केल्यानंतर आज मंत्रिमंडळाने हा निर्णय जाहीर केला. जिल्ह्यातील शेतकऱ्यांची मुले शिकून अधिकारी झाली पाहिजेत.

या भूमिकेतून आपण हा प्रश्न पोटतिडकीने मांडल्याचे आमदार गायकवाड म्हणतात. बुलडाण्यामध्ये जागेचीही उपलब्धता असल्याने या महाविद्यालयाच्या उभारणीचा मार्ग लवकरच प्रशस्त होईल, अशी बुलढाणेकरांना अपेक्षा आहे.

आजवर आपण जनतेला जी आश्वासने दिली ती पूर्ण करण्यासाठी सातत्याने प्रयत्न केला आहे. गेल्याच महिन्यात वैद्यकीय महाविद्यालयाला मंजुरी मिळाली. आता कृषी महाविद्यालय होणार. यापुढील मिशन फूड पार्क व टेक्सटाईल पार्क तसेच सूतगिरणी हे राहणार आहे. ते देखील लवकरात लवकर मंजूर करून घेऊ.

-संजय गायकवाड आमदार, बुलडाणा.

असे असेल कृषी महाविद्यालय

बुलडाणा येथील कृषी महाविद्यालयाच्या उभारणीसाठी मंत्रिमंडळाने १४६ कोटी रुपयांच्या खर्चाला मंजुरी दिली आहे.

बुलडाणा शहरालगत कृषी संशोधन केंद्राच्या सुमारे १५० एकर जागेमध्ये हे महाविद्यालय उभारले जाईल. यामध्ये खेळाची मैदाने व वस्तुतिगृहासह इतर सर्व सोयी सुविधा राहणार आहेत. २०२४ मध्ये याची प्रवेश प्रक्रिया सुरू होण्याची अपेक्षा आहे.