मुंबई : मानखुर्द येथील हिंदुस्तान बॅंकेच्या खातेदाराची फसवणूक करून ११ हजार रुपये चोरल्याच्या आरोपाखाली फिरोज खान (५६, रा. आंबिवली) याला पोलिसांनी अटक केली. त्याच्या साथीदाराचा शोध सुरू असल्याचे पोलिसांनी सांगितले.

आरोपी ठाणे जिल्ह्यातील आंबिवली येथील रहिवासी आहे. त्याने व त्याच्या साथीदाराने राकेशकुमार चव्हाण यांचे अकरा हजार रुपये घेऊन पळ काढला होता. चव्हाण यांनी दिलेल्या तक्रारीनंतर गुन्हा नोंदवून पोलिसांनी त्याला अटक केली असून त्याच्या साथीदाराचा शोध सुरू आहे.

राकेशकुमार चव्हाण यांनी बुधवारी सकाळी हिंदुस्तान को-ऑपरेटिव्ह बॅंकेच्या मानखुर्द शाखेतून ८५ हजार रुपये काढले. बॅंकेतील बाकावर पैसे मोजत बसले असता त्यांना दोन अनोळखी व्यक्तींनी बोलण्यात गुंतवले. त्यापैकी एकाने बंडलातील ५०० रुपयांची नोट खोटी असल्याचे सांगितले. खोट्या नोटा काढून देतो, असे सांगत त्याने चव्हाण यांच्याकडून ५० हजारांचे बंडल घेतले. त्यातील ११ हजार रुपये गुपचूप काढून घेतल्यानंतर ते दोघेही पसार झाले. त्यानंतर चव्हाण यांनी पुन्हा पैसे मोजले असता बंडलात ५०० रुपयांच्या २२ नोटा कमी असल्याचे आढळले.  चव्हाण यांनी तातडीने मानखुर्द पोलिस ठाणे गाठून तक्रार दाखल केली. पोलिसांनी फसवणुकीचा गुन्हा नोंदवून आरोपींचा शोध सुरू केला आहे.

हेही वाचा...जेव्हा अॅमेझाॅनचे मलक स्वत: देतात पॅकेजची डिलीव्हरी..