कल्याण : पर्यावरणाचा बिघडलेला समतोल सावरण्यासाठी केंद्र आणि राज्य सरकारतर्फे वृक्षारोपण मोहीम राबवली जाते. सरकारच्या या उपक्रमात सहभागी होत सार्वजनिक गणेशोत्सव सुभेदार वाडा शतकोत्तर रौप्य महोत्सव समितीतर्फे कल्याणजवळील बापगाव येथे 125 झाडांचे वृक्षारोपण करण्यात आले. या वृक्षांचे संवर्धन करण्याची जबाबदारीही मंडळाने उचलली आहे.

जून महिन्यात साजरा होणारा पर्यावरण दिन तसेच जुलैमध्ये सरकारतर्फे आयोजित करण्यात येत असलेल्या वृक्षारोपण कार्यक्रमानिमित्त मंडळाने आज (रविवार) सकाळी वृक्षारोपणाचा कार्यक्रम आयोजित केला होता. भारतीय जातींच्या वृक्षांचे यावेळी रोपण करण्यात आले. मंडळाचे संचालक भालचंद्र जोशी, मयूरेश आगलावे त्याचबरोबर बापगाव ग्रामपंचायतीचे सदस्य यावेळी उपस्थित होते. मंडळाच्या कार्यकर्त्यांनी आपल्या कुटुंबीयांसह या वृक्षारोपण मोहीमेत सहभाग नोंदविला.

शतकोत्तर रौप्यमहोत्सवी वर्षानिमित्त सुभेदार वाडा गणेशोत्सव मंडळाने विविध उपक्रम राबवले आहेत. जनसंपर्क वाढविण्यासाठी मंडळाने प्रत्येक महिन्याला शहराच्या वेगवेगळ्या भागात आरतीचे कार्यक्रम केले आहेत. चित्रकला, रांगोळी अशा स्पर्धांचेही मंडळाने आयोजन केले होते. ठाण्यातील वेदांत हॉस्पिटलच्या सहकार्याने मंडळातर्फे एकदिवसीय आरोग्य शिबिर आयोजित करण्यात आले होते. जुलै महिन्यात ज्येष्ठ नागरिक तसेच विविध गटातील शालेय विद्यार्थ्यांसाठी निबंध स्पर्धा, वक्तृत्व स्पर्धा तसेच पाठांतराच्या स्पर्धाही घेण्यात येणार आहेत. कल्याणातील माहेरवाशिणींचे संमेलन घेण्याचाही मंडळाचा मानस आहे.