मुंबई : मुंबईतील मालाड पूर्व येथील कुरार गावाजवळ येथे सोमवारी मध्यरात्री सिमाभींत कोसळून झालेल्या दुर्घटनेत 18 जणांचा जागीच मृत्यू झाला आहे. बचावकार्य अद्याप सुरु असून, ढिगाऱ्याखाली आणखी काही जण अडकल्याची शक्यता आहे.

मालाड पूर्व येथील पिंपरीपाडा कुरार गावाजवळील वनखात्याची संरक्षण भिंत कोसळली. टेकडीवर बांधलेल्या काही झोपडपट्ट्यांवर ही भिंत कोसळली. यामध्ये 18 जणांचा जागीच मृत्यू झाला. तर, अन्य काही जण या ढिगाऱ्याखाली अडकले असून, एनडीआरएफच्या जवानांकडून बचावकार्य सुरु आहे. या ठिकाणी जाण्यासाठी रस्ता छोटा असल्याने बचावकार्यात अडथळा येत आहे. मध्यरात्री दोनच्या सुमारास ही घटना घडली. पाणी जाण्यास जागा न ठेवल्याने ही दुर्घटना घडल्याचे स्थानिकांकडून सांगण्यात येत आहे.

सरकारने मालाडमध्ये मृत झालेल्या नागरिकांच्या नातेवाईकांना पाच लाख रुपयांची मदत जाहीर केली आहे. या दुर्घटनेत जखमी झालेल्या नागरिकांना जोगेश्वरीतील रुग्णालयात दाखल करण्यात आले आहे. कल्याणमध्येही शाळेची भिंत कोसळून 3 जणांचा मृत्यू झाला आहे. त्यामुळे अऩेक भागात भिंती कोसळण्याच्या घटना पाहायला मिळत आहेत.