मुंबई : एसटी महामंडळात नव्याने टाटा मोटर्सचे २५० चेसीस खरेदी करण्यात येणार आहे. त्यासाठी २७ फेब्रुवारी रोजी तातडीची बैठक बोलवण्यात आली असून, त्यामध्ये १२ मीटर लांबी असलेल्या २०० निमआराम आणि ५० शयनयान बसेसचे चेसिस खरेदी केल्यास लवकरच या बसेस एसटीच्या ताफ्यात सेवा देण्यासाठी सज्ज होणार आहे.

महामंडळाने यापुर्वीच १२ मिटर लांबीच्या २५० चेसीस खरेदीचे आदेश दिलेला होते. त्यावर बाहेरील बस बाँडी बांधणीकारांकडून बांधणीचे काम महामंडळाच्या मध्यवर्ती कार्यशाळेत करण्याचे नियोजन केले होते. मात्र, एसटी महामंडळाच्या सध्या स्थितीनुसार या नियोजनात बदल होण्याची शक्यता आहे. त्यामूळे महामंडळाने मुंबई सेंट्रल येथील मुख्यालयात तातडीची बैठक बोलवली आहे.

या बैठकीत चेसीस स्विकारण्यासाठी जबाबदार अधिकाऱ्यांना सुद्धा बोलवण्यात आले आहे. बैठकीमध्ये यापु्र्वी चेसीस स्विकारण्यात आल्याची माहिती आणि चेसिस स्विकारतांना येणाऱ्या अडचणींची माहिती अधिकाऱ्यांना सोबत आणण्याच्या सुचना देण्यात आल्या असून, यावेळी टाटा मोटर्सचे अधिकारी सुद्धा बैठकीला उपस्थित राहणार आहे.