मुंबई: गेले काही दिवस राज्यातील कोरोनाबाधितांचा आकडा वाढताना दिसत आहे. या पार्श्वभूमीवर राज्यात दिवसा जमावबंदी, रात्री नाईट कर्फ्यू आणि शनिवार-रविवारी वीकेंड लॉकडाउनचा निर्णय घेण्यात आला आहे. पण तरीदेखील कोरोनाबाधितांचा आकडा कमी होताना दिसत नाही. त्यामुळे निरपराध लोकांचा जीव वाचवण्यासाठी किमान तीन आठवड्यांचा कडक लॉकडाउन लावण्याशिवाय पर्याय नाही, असे स्पष्ट मत राज्याचे मदत व पुनर्वसन मंत्री विजय वडेट्टीवार यांनी टीव्हीनाइनशी बोलताना व्यक्त केले. राज्यातील कोरोनाची स्थिती पाहता काही दिवसांत रूग्णांवर उपचार करायला आरोग्यसेवक कमी पडतील. याचा वेळीच विचार करून तीन आठवड्याचा कडक लॉकडाउन करावा अशी विनंती मुख्यमंत्र्यांना करणार असल्याचेही त्यांनी सांगितले.

"आज जर महाराज असते तर...."; राणेंची उद्धव ठाकरेंवर टीका

लोकल ट्रेनच्या प्रवासावरही निर्बंधांचा विचार!

"राज्यातील कोरोनाची परिस्थिती दिवसेंदिवस हाताबाहेर चालली आहे. कोरोनाचा उद्रेक रोखण्यासाठी राज्य सरकार प्रयत्न करत आहे. पण कोणत्याच प्रयत्नांना यश येत नाही. त्यामुळे लोकांचे जीव वाचवण्यासाठी तीन आठवड्यांचा कडक लॉकडाऊन गरजेचा आहे. केंद्र सरकार महाराष्ट्राला चुकीची वागणूक देत आहे. लसींचा तुटवडा असूनही महाराष्ट्राला पुरवठा कमी केला जातोय. अशा परिस्थितीत लॉकडाऊन गरजेचा आहे. तसेच मुंबईतील लोकल ट्रेनच्या प्रवासावरही पुन्हा एकदा निर्बंध आणण्याचा विचार सुरू आहे", असे वडेट्टीवार म्हणाले.
'पहचान कौन?'; अमृता फडणवीसांचा उद्धव ठाकरेंना टोला

विरोधकांनी राजकारण न करता उपाय सुचवावेत!

"आगामी 10 दिवसांमध्ये महाराष्ट्रातील अ‍ॅक्टिव्ह रुग्णांचा आकडा हा 10 लाखांपर्यंत पोहोचू शकतो. सध्या भाजपकडून व्यापाऱ्यांना आंदोलन करण्यासाठी प्रोत्साहन दिलं जातंय. परिस्थिती लक्षात घेता विरोधकांनी यावरुन राजकारण न करता आम्हाला उपाय सुचवावेत. गुजरातमध्ये अनेक जिल्ह्यांत कडक लॉकडाऊन आहे. पण महाराष्ट्र सरकारने निर्णय घेतला तरच भाजपचे नेते टीका करतात", अशी टीका त्यांनी केली.