डोंबिवली - डोंबिवली पूर्वेतील सागर्ली येथील एका 6 वर्षीय मुलाचा लिफ्टसाठी खोदलेल्या खड्ड्यातील पाण्यात बुडून मृत्यु झाल्याची घटना सोमवारी घडली. वेदांत जाधव असे मुलाचे नाव आहे. सदर इमारतीचे बांधकाम गेल्या अनेक वर्षापासून सुरु असून अपूर्ण अवस्थेतील बांधकामे लहान मुलांच्या जीवावर बेतत आहेत. जानेवारी महिन्यात सागाव येथे देखील अशाच एका अपूर्ण बांधकाम असलेल्या इमारतीतील लिफ्टसाठी खोदलेल्या खड्ड्यातील पाण्यात बुडून 10 वर्षीय मुलाचा मृत्यु झाल्याची घटना घडली आहे. सागावच्याच घटनेची ही पुनरावृत्ती असून आणखी असे किती जणांचे बळी गेल्यानंतर प्रशासनाला जाग येणार आहे असा सवाल उपस्थित केला जात आहे.

सागर्ली येथील विघ्नहर्ता सोसायटीमध्ये वेदांत जाधव हा आजी, आजोबा आणि वडिलांसह रहातो. केवळ परिवाराचाच नाही तर शेजाऱ्यांचाही वेदांत हा लाडका होता. शेजारी राहणारे अवंतिका महाडिक व इला महाडिक हे देखील त्याचा तेवढ्याच मायेने सांभाळ करीत होते. सोसायटीच्या शेजारीच एका सात मजली इमारतीचे बांधकाम सुरु असून या ठिकाणी वेदांत कधी कधी खेळावयास जात असे. सोमवारी देखील वेदांत सकाळी 10.30 वाजता बाहेर खेळायला गेला होता, दुपारी 12 वाजले तरी तो घरी आला नाही म्हणून घरच्यांनी शोध घेण्यास सुरुवात केली. बांधकाम सुरु असलेल्या इमारतीच्या ठिकाणी जाऊन पाहिले असता तेथील खड्ड्यातील पाण्यात वेदांत दिसून आला. दुपारी 2.30 च्या सुमारास त्याला पाण्यातून बाहेर काढण्यात आले, मात्र तोपर्यंत त्याचा मृत्यु झाला होता. वेदांत याचा मृतदेह उत्तरीय तपासणीसाठी शास्त्रीनगर रुग्णालयात पाठविण्यात आला आहे. याप्रकरणी मानपाडा पोलिस ठाण्यात याप्रकरणी नोंद करण्यात आली असून पोलीस अधिक तपास करीत आहेत.

सदर इमारत ही अनधिकृत असल्याची प्राथमिक माहिती असून कल्याण डोंबिवलीत असे अनेक अनधिकृत बांधकामे अर्धवट अवस्थेत पडून आहेत. ही अर्धवट बांधकामे लहान मुलांचा जीवावर बेतत आहेत. पाण्यामध्ये प्लास्टिकचा बॉल असून हा बॉल काढण्यासाठीच वेदांत गेला असावा आणि त्याचा दुर्दैवी मृत्यु झाला असल्याचा प्राथमिक अंदाज वर्तविला जात आहे. 19 जानेवारीला सागाव येथील सत्यम मौर्य याचा लिफ्टसाठी खोदलेल्या खड्ड्यातील पाण्यात बुडून मृत्यू झाला होता.