मुंबई : मालाड येथील एका विदेशी मुद्रा व्यापाऱ्याच्या कंपनीत कार्यरत दोन कर्मचाऱ्यांकडून चाकूच्या धाकावर 75 लाख रुपये लुटण्यात आले होते. याप्रकरणी पोलिसांनी 7 आरोपींना वेगवेगळ्या ठिकाणांहून अटक करण्यात आली आहे.

लुटलेली 15 लाखांची रोकड जप्त करण्यात पोलिसांना यश आले असून गुन्ह्यात वापरलेले दोन दुचाकी आणि एक शस्त्रही जप्त केले आहे. या गुन्ह्यात सहभागी असलेल्या आणखी आरोपींचा मालाड पोलीस शोध घेत आहेत.

पोलिसांनी दिलेल्या माहितीनुसार, 28 ऑगस्ट रोजी रात्री मालाडस्थित फॉरेक्स एक्सचेंज कंपनीत कार्यरत प्रतीक भोजने आणि गणेश तळवटकर याना चाकुच्या धाकावर लुटण्यात आले. हे दोन कर्मचारी दोन वेगवेगळ्या बॅगमध्ये ठेवलेले 50 लाख आणि 25 लाख रुपये त्यांच्या मार्वे रोड स्थित त्यांच्या मालकाच्या घरी घेऊन जात होते.

बॅग घेऊन दोघे पटेल यांच्या इमारतीत पोहोचले असता तिथे दुचाकीवरून 3 अज्ञात तेथे आले. त्यातील दोघे खाली उतरले आणि एकाने चाकू काढून भोजने यांना जीवे मारण्याची धमकी दिली. दुसऱ्या दरोडेखोराने तळवटकर यांना धक्काबुक्की केली. नंतर, त्यांनी दोन्ही बॅग हिसकावून मोटारसायकलवरून पळ काढला.

भोजने यांनी तात्काळ त्यांच्या मालकाला फोन करून घटनेची माहिती दिली. फॉरेक्स एक्सचेंज कंपनीने मालाड पोलिसांशी संपर्क साधून तक्रार दाखल केली.तांत्रिक तपासातून मिळालेल्या माहितीनुसार लोणावळा, पुणे, नाशिक, रायगड, जालना आणि मुंबई येथून 7 आरोपींना अटक करण्यात आली. या गुन्ह्यात सहभागी असणाऱ्या अन्य आरोपीचा पोलीस शोध घेत आहे.